تاجر سے 50 لاکھ روپے بھتہ مانگنے والے ملزمان گرفتار، اسلحہ بھی برآمد

ملزمان کے خلاف مختلف تھانوں میں 10 سے زائد مقدمات درج ہیں جب کہ مزید تفتیش جاری ہے، پولیس

اسٹاف رپورٹر اتوار 9 مئ 2021

ملزمان کے خلاف مختلف تھانوں میں 10 سے زائد مقدمات درج ہیں جب کہ مزید تفتیش جاری ہے، پولیس فوٹو : فائل

کراچی: اسپیشل انویسٹی گیشن پولیس نے تاجر سے 50 لاکھ روپے بھتہ مانگنے والے 3 ملزمان کو گرفتار کرکے اسلحہ برآمد کرلیا۔

لیاقت آباد کے علاقے میں 3 ملزمان نے تاجر سے 50 لاکھ روپے بھتہ مانگا تھا اور نہ دینے پر جان سے مارنے کی دھمکی دی تھی جب کہ ملزمان جاتے ہوئے فائرنگ بھی کرتے ہوئے گئے۔ پولیس نے واقعہ کا مقدمہ دہشت گردی ایکٹ کے تحت نامعلوم ملزمان کے خلاف درج کرکے تفتیش اسپیشل انویسٹی گیشن پولیس کے حوالے کردی۔

پولیس نے سی سی ٹی وی فوٹیج کی مدد سے شناخت کرنے کے بعد ان کے ٹھکانوں پر چھاپے مارکر 3 ملزمان سلیمان عرف مکھن، وسیم اور نوید کو گرفتار کرکے 3 ٹی ٹی پسٹل برآمد کرلیں، پولیس کے مطابق تینوں ملزمان کے خلاف مختلف تھانوں میں 10 سے زائد مقدمات درج ہیں اور ان سے مزید تفتیش کی جارہی ہے۔