متحدہ عرب امارات نے پاکستان سے آنے والے مسافروں پر پابندی لگا دی

ویب ڈیسک  پير 10 مئ 2021
متحدہ عرب امارات سے ان ممالک کو جانے والی پروازیں جاری رہیں گی، فوٹو: فائل

متحدہ عرب امارات سے ان ممالک کو جانے والی پروازیں جاری رہیں گی، فوٹو: فائل

ابوظہبی: متحدہ عرب امارات نے 12 مئی سے پاکستان سمیت بنگلا دیش، نیپال اور سری لنکا کے سے آنے والے مسافروں کے ملک میں داخلے پر پابندی عائد کردی۔

عالمی خبر رساں ادارے کے مطابق متحدہ عرب امارات کی سول ایوی ایشن کی ویب سائٹ پر جاری بیان میں کہا گیا ہے کہ کورونا کے بڑھتے ہوئے کیسز کو مدنظر رکھتے ہوئے 12 مئی سے پاکستان، بنگلا دیش، نیپال اور سری لنکا سے آنے والے مسافروں کے ملک میں داخل ہونے پر پابندی عائد کردی ہے۔

بیان میں مزید کہا گیا ہے کہ اس پابندی کا اطلاق ان ممالک کو متحدہ عرب امارات سے جانے والی پروازوں پر نہیں ہوگا۔ متحدہ عرب امارات نے گزشتہ ماہ بھارت پر بھی سفری پابندی کا اعلان کیا تھا۔

یہ خبر پڑھیں : کورونا وبا: سعودی عرب نے پاکستان سمیت متعدد ممالک پر سفری پابندیاں لگادیں 

پابندی کے شکار ممالک کے ساتھ متحدہ عرب امارات کے مابین منظور شدہ سفارتی مشن، سرکاری وفود، کاروبار طیارے اور سنہری ریزیڈینسی ہولڈرز کو سخت ایس او پیز کے ساتھ داخلے کی اجازت ہوگی جس میں 48 گھنٹے قبل تسلیم شدہ لیبارٹریز سے کرایا گیا کورونا پی سی آر ٹیسٹ منفی ہونا بھی شامل ہے۔

پابندی کا اطلاق ٹرانزٹ ویزہ رکھنے والے مسافروں پر بھی ہوگا۔ متحدہ عرب امارات کی ایوی ایشن اتھارٹی نے اپنے اس فیصلے سے پاکستان سمیت متعلقہ ممالک کو آگاہ کر دیا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔