تاریخی مقام بھنبھور کے قریب قدیم ترین دور کےآثار دریافت

اٹلی اور فرانس کے ماہرین کی زیرنگرانی ٹیلوں کی کھدائی جاری، مٹی کے برتن، سکّے، موتی اور انسانی ڈھانچہ برآمد

نامہ نگار / ایکسپریس نیوز ڈیسک جمعرات 16 جنوری 2014

محکمہ آثار قدیمہ کے آرکیالاجسٹ کے مطابق کھدائی کرنے پر مزید نوادرات ملنے کا امکان ہے۔فوٹو:فائل

دھابے جی / گھارو: تاریخی مقام بھنبھورو کے قریب کھدائی کے دوران انتہائی قدیم دور کے مزید آثار دریافت ہوئے ہیں، ملکی و غیرملکی ماہرین کا تحقیق کے لیے کھدائی جاری رکھنے کا فیصلہ، کھدائی کے دوران مٹی کے برتن ، سکّے، انسانی ڈھانچے، موتی ودیگر نوادرات دریافت ہوئے۔

تفصیلات کے مطابق سندھ کے تاریخی ورثے اور ٹھٹھہ کے تاریخی مقام بھنبھور کے قریب ملکی و غیرملکی آرکیالاجسٹ نے کھدائی کے دوران مزید آثار دریافت کر لیے ہیں، چار قدیم تہذیبوں کی تاریخ رکھنے والے بھنبھورو کے قریب فرانس اور اٹلی سے آنے والی ماہرین کی ٹیم مس مونیکا اور نکیلو کی نگرانی میں گزشتہ ایک ہفتے سے مزید آثار کی تلاش کیلیے کھدائی کا سلسلہ جاری رکھے ہوئے ہے۔

آثار قدیمہ کی 12 رکنی ٹیم کو کھدائی کے دوران قدیم دور کے آثار ملے ہیں، جن میںمٹی کے برتنوں کے ٹکڑے، سکے، انسانی ڈھانچے، تانبے کے چمچ، موتی ودیگر نوادرات شامل ہیں، جنھیں تحقیق کے لیے لیبارٹری بھیجنے کا فیصلہ کیا گیا ہے۔ محکمہ آثار قدیمہ کے آرکیالاجسٹ کے مطابق کھدائی کرنے پر مزید نوادرات ملنے کا امکان ہے۔