چین کی پانچ برس کے دوران پاکستان میں 5.4 ارب ڈالر کی سرمایہ کاری

اسلام آباد: سرمایہ کاری بورڈ کا کہنا ہے کہ 10 سال کے دوران چین نے پاکستان میں 5 ارب 39 کروڑ 90 لاکھ ڈالر کی براہ راست غیر ملکی سرمایہ کاری ( ایف ڈی آئی ) کی، رواں مالی سال کے 9 ماہ میں (جولائی تا مارچ ) کے دوران پاکستان میں 65 کروڑ آٹھ لاکھ ڈالر کی سرمایہ کاری کے ساتھ چین سر فہرست رہا۔

سرمایہ کاری بورڈ ( بی او آئی) کے اعداد و شمار کے مطابق چین کی جانب سے مالی سال 18-2017 کے دوران سرمایہ کاری کا حجم ایک ارب 31 کروڑ 19 لاکھ ڈالر رہا جبکہ مالی سال 16-2015ء کے دوران چین کے سرمایہ کاروں کی طرف سے پاکستان میں ایک ارب 4 کروڑ 83 لاکھ ڈالر کی ایف ڈی آئی کی گئی تھی۔

رپورٹ کے مطابق مالی سال 11-2010 میں چینی سرمایہ کاروں نے پاکستان میں 4 کروڑ 74 لاکھ ڈالر کی براہ راست غیر ملکی سرمایہ کاری کی تھی، مالی سال 12-2011 میں چین کی پاکستان میں ایف ڈی آئی کا حجم 126.1 ملین ڈالررہا۔

مالی سال 13-2012ء میں چین کی ایف ڈی آئی 90.6 ملین ڈالر رہی تھی جو آئندہ مالی سال 14-2013 کے دوران 685.8 ملین ڈالر تک پہنچ گئی اور مالی سال 15-2014 میں پاکستان میں چین کی براہ راست غیر ملکی سرمایہ کاری کا حجم 340.8 ملین ڈالر رہا تھا۔

اعداد و شمار کے مطابق مالی سال 16-2015ء میں چین کی ایف ڈی آئی کا حجم 1048.3 ملین ڈالر تک پہنچ گیا۔ مالی سال 17-2016ء کے دوران چین کے سرمایہ کاروں نے پاکستان میں 763.2 ملین ڈالر براہ راست غیر ملکی سرمایہ کاری کی جو مالی سال 18-2017 کے لیے 1311.9 ملین ڈالر کی سطح تک بڑھ گئی۔

رپورٹ کے مطابق مالی سال 19-2018ء میں چین کی ایف ڈی آئی کا حجم 130.8 ملین ڈالر رہا تھا جو گزشتہ مالی سال 20-2019ء کے دوران 844.1 ملین ڈالر تک بڑھ گیا اور جاری مالی سال 21-2020ء کے پہلے 9 ماہ کے دوران پاکستان میں 650.8 ملین ڈالر کی براہ راست غیر ملکی سرمایہ کے ساتھ چین پہلے نمر پر رہا۔