دنیا و آخرت کی فلاح کے راہ نما اصول

’’ان ایمان والوں نے یقیناً کام یابی حاصل کرلی جن کی نمازوں میں خشوع و خضوع ہے۔ جو لغو کاموں سے دُور رہتے ہیں۔

جو زکوٰۃ کی ادائی کرتے ہیں۔ جو اپنی شرم گاہوں کی (اور سب سے) حفاظت کرتے ہیں سوائے اپنی بیویوں اور اُن کنیزوں کے جو اُن کی ملکیت میں آچکی ہوں کیوں کہ ایسے لوگ قابل ملامت نہیں ہیں۔ ہاں جو لوگ اس کے علاوہ کوئی اور طریقہ اختیار کرنا چاہیں تو ایسے لوگ حد سے گزرے ہوئے ہیں۔ اور وہ جو اپنی امانتوں اور اپنے عہد کا پاس رکھنے والے ہیں۔ اور جو اپنی نمازوں کی پوری نگرانی رکھتے ہیں۔ یہ ہیں وہ وارث جنہیں جنت الفردوس کی میراث ملے گی۔ یہ اس میں ہمیشہ ہمیشہ رہیں گے۔‘‘ (سورہ المؤمنون کی ابتدائی گیارہ آیات میں مومنین کی بعض صفات کا مفہوم)

اﷲ تعالیٰ (جو انس و جن و تمام مخلوقات کا پیدا کرنے والا ہے، جو خالق مالک رازق کائنات ہے، جس کا کوئی شریک نہیں ہے، جو انسان کی رگ رگ سے ہی نہیں بل کہ کائنات کے ذرّے ذرّے سے اچھی طرح واقف ہے) نے انسان کی کام یابی کے لیے ان آیات میں اﷲ اور اس کے رسول ﷺ پر ایمان کے علاوہ وہ صفات ذکر فرمائی ہیں کہ اگر کوئی شخص واقعی کام یاب ہونا چاہتا ہے تو وہ دنیاوی فانی زندگی میں موت سے قبل ان سات اوصاف کو اپنے اندر پیدا کرلے۔

ان سات اوصاف کے حامل ایمان والے جنت کے اُس حصے کے وارث بنیں گے جو جنّت کا اعلیٰ و بلند حصہ ہے، جہاں ہر قسم کا سُکون و اطمینان و آرام و سہولت ہے، جہاں ہر قسم کے باغات، چمن، گلشن اور نہریں پائی جاتی ہیں، جہاں خواہشوں کی تکمیل ہے، جس کو قرآن و سنت میں جنّت الفردوس کے نام سے موسوم کیا گیا ہے۔ یہی اصل کام یابی ہے کہ جس کے بعد کبھی ناکامی، پریشانی، دشواری، مصیبت اور تکلیف نہیں ہے، لہذا ہم دنیاوی عارضی و محدود خوش حالی کو فلاح نہ سمجھیں بل کہ ہمیشہ کی کام یابی کے لیے کوشاں رہیں۔

ایمان والوں سے مراد وہ لوگ ہیں جنہوں نے اﷲ تعالیٰ کی وحدانیت کا اقرار کیا، حضور اکرم ﷺ کو آخری پیغمبر تسلیم کیا اور آپؐ کی تعلیمات پر عمل پیرا ہوئے۔ انسان کی کام یابی کے لیے سب سے پہلی اور بنیادی شرط اﷲ تعالیٰ اور اس کے رسول ﷺ پر ایمان لانا ہے، اس کے علاوہ انسان کی کام یابی کے لیے جو سات اوصاف اﷲ تبارک و تعالیٰ نے ان آیات میں ذکر فرمائے ہیں وہ یہ ہیں:

1) خشوع و خضوع کے ساتھ نماز کی ادائی: خضوع کے معنی ظاہری اعضاء کو جھکانے (یعنی جسمانی سکون) اور خشوع کے معنی دل کو عاجزی کے ساتھ نماز کی طرف متوجہ رکھنے کے ہیں۔ خشوع و خضوع کے ساتھ نماز پڑھنے کا آسان طریقہ یہ ہے کہ ہم نماز میں جو کچھ پڑھ رہے ہیں اس کی طرف دھیان رکھیں اور اگر غیر اختیاری طور پر کوئی خیال آجائے تو وہ معاف ہے، لیکن جوں ہی یاد آجائے دوبارہ نماز کے الفاظ کی طرف متوجہ ہوجائیں۔ غرض یہ کہ ہماری پوری کوشش ہونی چاہیے کہ نماز کے وقت ہمارا دل اﷲ تعالیٰ کی طرف متوجہ رہے اور ہمیں یہ معلوم ہو کہ ہم نماز کے کس رکن میں ہیں اور کیا پڑھ رہے ہیں۔

اسی طرح ہمیں اطمینان و سکون کے ساتھ نماز پڑھنی چاہیے جیسا کہ حضرت ابوہریرہؓ سے روایت ہے کہ رسول اﷲ ﷺ مسجد میں تشریف لائے۔ ایک اور صاحب بھی مسجد میں آئے اور نماز پڑھی پھر (رسول اﷲ ﷺ کے پاس آئے اور) رسول اﷲ ﷺ کو سلام کیا۔ آپؐ نے سلام کا جواب دیا اور فرمایا: جاؤ نماز پڑھو کیوں کہ تم نے نماز نہیں پڑھی۔ وہ گئے اور جیسے نماز پہلے پڑھی تھی ویسے ہی نماز پڑھ کر آئے، پھر رسول اﷲ ﷺ کو آکر سلام کیا۔

آپؐ نے فرمایا: جاؤ نماز پڑھو کیوں کہ تم نے نماز نہیں پڑھی۔ اس طرح تین مرتبہ ہوا۔ اُن صاحب نے عرض کیا: اُس ذات کی قسم جس نے آپؐ کو حق کے ساتھ بھیجا ہے، میں اس سے اچھی نماز نہیں پڑھ سکتا، آپ مجھے نماز سکھائیے۔ آپؐ نے ارشاد فرمایا: جب تم نماز کے لیے کھڑے ہو تو تکبیر کہو، پھر قرآن مجید میں سے جو کچھ پڑھ سکتے ہو پڑھو۔ پھر رکوع میں جاؤ تو اطمینان سے رکوع کرو، پھر رکوع سے کھڑے ہو تو اطمینان سے کھڑے ہو، پھر سجدہ میں جاؤ تو اطمینان سے سجدہ کرو، پھر سجدہ سے اٹھو تو اطمینان سے بیٹھو۔ یہ سب کام اپنی پوری نماز میں کرو۔ (صحیح بخاری)

2) لغو کاموں سے دوری: لغو اس بات اور کام کو کہتے ہیں جو فضول، لایعنی اور لاحاصل ہو، یعنی جن باتوں یا کاموں کا کوئی فائدہ نہ ہو۔ مولائے حقیقی نے ان آیات میں ارشاد فرمایا کہ لغو کاموں کو کرنا تو درکنار اُن سے بالکل دور رہنا چاہیے۔ ہمیں ہر فضول بات اور کام سے بچنا چاہیے قطع نظر اس کے کہ وہ مباح ہو یا غیر مباح کیوں کہ نبی اکرم ﷺ نے ارشاد فرمایا: ’’انسان کا اسلام اسی وقت اچھا ہوسکتا ہے جب کہ وہ بے فائدہ اور فضول چیزوں کو چھوڑ دے۔‘‘ (ترمذی)

3) زکوۃ کی ادائی: انسان کی کام یابی کے لیے تیسری اہم شرط زکوٰۃ کے فرض ہونے پر اس کی ادائی ہے، زکوۃ اسلام کے بنیادی پانچ ارکان میں سے ایک ہے، اﷲ تبارک و تعالیٰ نے قرآن کریم میں نماز کے بعد سب سے زیادہ حکم زکوۃ کی ادائی کا ہی دیا ہے۔ سورہ التوبہ میں اﷲ تعالیٰ نے اُن لوگوں کے لیے بڑی سخت وعید بیان فرمائی ہے جو اپنے مال کی کماحقہ زکوٰۃ نہیں نکالتے۔ اُن کے لیے بڑے سخت الفاظ میں خبر دی ہے، چناں چہ فرمایا گیا کہ جو لوگ اپنے پاس سونا چاندی جمع کرتے ہیں اور اُس کو اﷲ کے راستے میں خرچ نہیں کرتے، تو (اے نبی ﷺ) آپ اُن کو ایک دردناک عذاب کی خبر دے دیجیے، یعنی جو لوگ اپنا پیسہ، اپنا روپیہ، اپنا سونا چاندی جمع کرتے جارہے ہیں اور اُن کو اﷲ کے راستے میں خرچ نہیں کرتے، اُن پر اﷲ نے جو فریضہ عاید کیا ہے اُس کو ادا نہیں کرتے، اُن کو یہ بتا دیجیے کہ ایک دردناک عذاب اُن کا انتظار کررہا ہے۔ پھر دوسری آیت میں اُس دردناک عذاب کی تفصیل ذکر فرمائی کہ یہ دردناک عذاب اُس دن ہوگا جس دن سونے اور چاندی کو آگ میں تپایا جائے گا اور پھر اُس آدمی کی پیشانی، اُس کے پہلو اور اُس کی پشت کو داغا جائے گا اور اس سے یہ کہا جائے گا کہ یہ ہے وہ خزانہ جو تم نے اپنے لیے جمع کیا تھا، آج تم اس خزانے کا مزہ چکھو جو تم اپنے لیے جمع کررہے تھے۔ اﷲ تعالیٰ ہم سب کو اِس انجام بد سے محفوظ فرمائے، آمین۔ بعض مفسرین نے اس آیت سے مراد تزکیۂ نفس لیا ہے یعنی وہ ایمان والے اپنے آپ کو بُرے اعمال اور اخلاق سے پاک صاف کرتے ہیں۔

4) شرم گاہوں کی حفاظت: اﷲ تعالیٰ نے جنسی خواہش کی تکمیل کا ایک جائز طریقہ یعنی نکاح مشروع کیا ہے۔ انسان کی کام یابی کے لیے اﷲ تبارک و تعالیٰ نے ایک شرط یہ بھی رکھی ہے کہ ہم جائز طریقہ کے علاوہ اپنی شرم گاہوں کی حفاظت کریں۔ اس آیت کے اختتام پر اﷲ تعالیٰ نے ارشاد فرمایا کہ میاں بیوی کا ایک دوسرے سے شہوت نفس کو تسکین دینا قابل ملامت نہیں بل کہ انسان کی ضرورت ہے۔ لیکن جائز طریقے کے علاوہ کوئی بھی صورت شہوت پوری کرنے کی جائز نہیں ہے۔ جیسا کہ اﷲ تعالیٰ نے ارشاد فرمایا کہ جائز طریقے کے علاوہ کوئی اور طریقہ اختیار کرنا چاہیں تو ایسے لوگ حد سے گزرے ہوئے ہیں۔

اﷲ تعالیٰ نے زنا کے قریب بھی جانے کو منع فرمایا ہے۔ (سورہ الاسراء) نبی اکرم ﷺ نے فرمایا، مفہوم: ’’آنکھ بھی زنا کرتی ہے اور اس کا زنا بُری نظر ہے۔‘‘ فحاشی اور عریانی کی وجہ سے ہماری ذمے داری بڑھ جاتی ہے کہ ہم خود بھی زنا اور زنا کے لوازمات سے بچیں اور اپنے بچوں، بچیوں اور گھر والوں کی ہر وقت نگرانی رکھیں کیوں کہ اسلام نے انسان کو زنا کے اسباب سے بھی دور رہنے کی تعلیم دی ہے۔ زنا کے وقوع ہونے کے بعد اس پر ہنگامہ، جلسہ و جلوس و مظاہروں کے بہ جائے ضرورت اس بات کی ہے کہ اسلامی تعلیمات کے مطابق حتی الامکان غیر محرم مرد و عورت کے اختلاط سے ہی بچا جائے۔

5) امانت کی ادائی: امانت کا لفظ ہر اس چیز کو شامل ہے جس کی ذمے داری کسی شخص نے اٹھائی ہو اور اس پر اعتماد و بھروسا کیا گیا ہو، خواہ اس کا تعلق حقوق العباد سے ہو یا حقوق اﷲ سے۔ حقوق اﷲ سے متعلق امانت فرائض و واجبات کی ادائی اور محرمات و مکروہات سے پرہیز کرنا ہے اور حقوق العباد سے متعلق امانت میں مالی امانت کا داخل ہونا تو مشہور و معروف ہے، اس کے علاوہ کسی نے کوئی راز کی بات کسی کو بتلائی تو وہ بھی اس کی امانت ہے، اذن شرعی کے بغیر کسی کا راز ظاہر کرنا امانت میں خیانت ہے۔ اسی طرح کام کی چوری یا وقت کی چوری بھی امانت میں خیانت ہے۔ لہذا ہمیں امانت میں خیانت سے بچنا چاہیے۔

6) عہد و پیمان پورا کرنا: عہد ایک تو وہ معاہدہ ہے جو دو طرف سے کسی معاملے میں لازم قرار دیا جائے، اس کا پورا کرنا ضروری ہے، دوسرا وہ جس کو وعدہ کہتے ہیں یعنی کوئی شخص کسی شخص سے کوئی چیز دینے کا یا کسی کام کے کرنے کا وعدہ کرلے، اس کا پورا کرنا بھی شرعاً ضروری ہوجاتا ہے۔ غرض یہ کہ اگر ہم کسی شخص سے کوئی عہد و پیمان کرلیں تو اس کو پورا کریں۔

7) نماز کی پابندی: کام یاب ہونے والے وہ ہیں جو اپنی نمازوں کی بھی پوری نگرانی رکھتے ہیں یعنی پانچوں نمازوں کو ان کے اوقات پر اہتمام کے ساتھ پڑھتے ہیں۔ نماز میں اﷲ تعالیٰ نے یہ خاصیت و تاثیر رکھی ہے کہ وہ نمازی کو گناہوں اور برائیوں سے روک دیتی ہے مگر ضروری ہے کہ اس پر پابندی سے عمل کیا جائے اور نماز کو اُن شرائط و آداب کے ساتھ پڑھا جائے جو نماز کی قبولیت کے لیے ضروری ہیں، جیسا کہ اﷲ تعالیٰ نے قرآن کریم میں ارشاد فرمایا، مفہوم: (سورہ العنکبوت) ’’نماز قائم کیجیے، یقیناً نماز بے حیائی اور برائی سے روکتی ہے۔‘‘ اسی طرح حدیث میں ہے کہ ایک شخص نبی اکرمؐ ﷺ کی خدمت میں آیا اور کہا کہ فلاں شخص راتوں کو نماز پڑھتا ہے مگر دن میں چوری کرتا ہے تو نبی اکرم ؐ نے فرمایا کہ  اُس کی نماز عن قریب اُس کو اِس بُرے کام سے روک دے گی۔

(مسند احمد، صحیح ابن حبان، بزاز)

یہ بات قابل ذکر ہے کہ اﷲ تعالیٰ نے انسان کی کام یابی کے لیے ضروری سات اوصاف کو نماز سے شروع کیا اور نماز پر ہی ختم کیا، اس میں اشارہ ہے کہ نماز کی پابندی اور صحیح طریقہ سے اس کی ادائی انسان کو پورے دین پر چلنے کا اہم ذریعہ بنتی ہے۔ اسی لیے قرآن کریم میں سب سے زیادہ نماز کی ہی تاکید فرمائی گئی ہے۔ کل قیامت کے دن سب سے پہلے نماز ہی کے متعلق سوال کیا جائے گا۔ نماز کے علاوہ تمام احکام اﷲ تعالیٰ نے حضرت جبرائیل علیہ السلام کے واسطے دنیا میں اتارے مگر نماز ایسا مہتمم بالشان عمل ہے کہ اﷲ تعالیٰ نے ساتوں آسمانوں کے اوپر حضرت جبرائیلؑ کے واسطے کے بغیر نماز کی فرضیت کا تحفہ اپنے حبیبؐ کو عطا فرمایا۔ اﷲ تعالیٰ ہم سب کو نمازوں کا اہتمام کرنے والا بنائے۔

ان سات اوصاف سے متصف ایمان والوں کو اﷲ تبارک و تعالیٰ نے جنت الفردوس کا وارث بتلایا ہے۔ لفظ وارث میں اس طرف اشارہ ہے کہ جس طرح مورث کا مال اس کے وارث کو پہنچنا قطعی اور یقینی ہے اسی طرح ان سات اوصاف والوں کا جنت الفردوس میں داخلہ یقینی ہے۔

اﷲ تعالیٰ ہم سب کو ان سات اوصاف کے ساتھ زندگی گزارنے کی توفیق عطا فرمائے اور ہمیں جنّت الفردوس کا وارث بنائے۔ آمین