سندھ میں فلورملوں نے گندم کی دھلائی اور پسائی بند کردی

کراچی: پاکستان فلور ملز ایسوسی ایشن نے ٹرن اوور ٹیکس کی شرح میں اضافے اور چوکر پر سیلز ٹیکس عائد کرنے کے خلاف بدھ کو سندھ کی 150فلورملوں میں گندم کی دھلائی اور گرائنڈنگ بند کردی ہے۔

فلورملز ایسوسی ایشن کے ذرائع نے ’’ایکسپریس ‘‘ کو بتایا کہ سندھ میں گندم کی 100کلوگرام کی یومیہ ایک لاکھ 40 ہزار بوریوں سے ایک لاکھ 18ہزار بوری آٹے کی پیداوار ہوتی ہے اور اسی گندم سے 100کلوگرام کی یومیہ 28 ہزار بوریوں سے چوکر کی پیداوار بھی کی جاتی ہے۔

ذرائع نے بتایا کہ فلور ملوں میں گندم کی دھلائی کے بارہ گھنٹے بعد آٹے کی پیداوار اور چوکر کے لیے گرائنڈ کیا جاتاہے۔ بدھ کی صبح سے گندم کی دھلائی بند ہونا جمعرات سے فلورملوں کی ہڑتال کی تیاری کی نشاندہی کررہی ہے۔

واضح رہے کہ پاکستان فلور ملز ایسوسی ایشن کے عہدیداروں نے منگل کو پریس کانفرنس کے دوران حکومت پر واضح کردیا تھا کہ وہ 24 اور 25جون کو 2 روزہ ٹوکن ہڑتال کریں گے، اگر اس ٹوکن ہڑتال کے باوجود ان کے مطالبات تسلیم نہ کیے گئے تو ملک بھر کی فلور ملیں 30جون سے غیرمعینہ مدت کی ہڑتال پر چلی جائیں گی۔