باجوڑ کے راغگان ڈیم میں کشتی ڈوبنے سے 4 افراد جاں بحق، 7 لاپتہ

ضلع باجوڑ کی تحصیل خار کے علاقے میں راغگان ڈیم میں کشتی الٹنے سے 18 افراد ڈوب گئے۔

ریسکیو 1122 کے مطابق کشتی ڈوبنے سے 4 افراد جاں بحق اور 7 لاپتہ ہوگئے۔ واقعے کی اطلاع ملتے ہی ریسکیو 1122، آرمی کے غوطہ خوروں اور دیگر امدادی اداروں نے رات کے وقت آپریشن میں حصہ لیا۔

کشتی میں 18 افراد سوار تھے جن میں سے 4 افراد کی لاشیں نکال کر ورثا کے حوالے کر دی گئیں۔ 7 افراد کو بچالیا گیا جب کہ 7 افراد ابھی تک لاپتہ ہیں۔ زندہ نکالے گئے افراد کو اسپتال منتقل کر دیا گیا جہاں ان کا علاج معالجہ ہو رہا ہے۔ جن افراد کو بچایا گیا ان میں سے 6 افراد زیر علاج ہیں اور 1 کو اسپتال سے ڈسچارج کردیا گیا۔ کشتی میں مقامی سیاح سوار تھے جو عید پر پکنک منانے ڈیم گئے تھے جب کہ کشتی خستہ حال ہونے اور گنجائش سے زیادہ افراد کو بٹھانے کی وجہ سے ڈوبی۔

وزیراعلی خیبر پختونخوا محمود خان نے واقعے پر اظہار افسوس کرتے ہوئے جاں بحق افراد کے لواحقین سے دلی ہمدردی اور تعزیت کا اظہار کیا۔ وزیر اعلی نے زخمیوں کی جلد صحت یابی کے لئے نیک خواہشات کا اظہار کرتے ہوئے جاں بحق افراد کی معفرت اور پسماندگان کے لئے صبر جمیل کی دعا کی۔

باجوڑ:افسوسناک واقعہ۔کشتیاں ڈوب گئیں,4 افرادجانبحق, زرائع
باجوڑ میں راغگان ڈیم میں سیروتفریح کے لیے آئے ہوئے سیاح ڈوب گئے،ایک کشتی اوورلوڈ ہونے کے بعدڈوب گئ، مدد کے لیے گئی دوسری کشتی بھی ڈوب گئی،ڈاکٹروں نے 4 افراد کے جانبحق ہونے کی تصدیق کردی جبکہ 6افراد زیر علاج ہیں pic.twitter.com/a4HrcZg4UB

— Malak Rahman Malak (@MRahman80456310) July 21, 2021