پنجاب میں محرم الحرام کے دوران موبائل ویکسینیشن کا فیصلہ

ویب ڈیسک  اتوار 1 اگست 2021
بروقت اور فوری ویکسین لگوانا ہی بہترین علاج ہے، سارہ اسلم فوٹو: فائل

بروقت اور فوری ویکسین لگوانا ہی بہترین علاج ہے، سارہ اسلم فوٹو: فائل

 لاہور: محکمہ پرائمری اینڈ سکینڈری ہیلتھ پنجاب نے صوبے بھر میں محرم الحرام کے دوران موبائل ویکسی نیشن ٹیمیں تعینات کرنے کا فیصلہ کرلیا ہے۔

سیکرٹری محکمہ پرائمری اینڈ سکینڈری ہیلتھ پنجاب سارہ اسلم کے مطابق صوبائی ذیلی کمیٹی برائے کورونا کی سفارشات کے مطابق محرم الحرام میں موبائل ویکسینیشن کا انتظام کیا جارہا ہے-اس حوالے سے تمام اضلاع کے ڈپٹی کمشنرز کو مراسلہ جاری کر دیا گیا ہے۔ کورونا موبائل ویکسینیشن ٹیمیں امام بارگاہوں ، مجالس اور جلوسوں کے داخلی راستوں پر تعینات ہوں گی، موبائل ویکسینیشن ٹیموں کی تعیناتی کا فیصلہ عزاداروں کی سہولت کے لیے کیا گیا ہے۔

سارہ اسلم کا کہنا ہے کہ محرم الحرام کی مجالس اور جلوسوں کے شرکا کورونا کے ایس او پیز پر لازماً عمل کریں، مجالس اور جلوس میں شرکت سے پہلے ویکسین لازمی لگوا لیں کیونکہ بروقت اور فوری ویکسین لگوانا ہی بہترین علاج ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔