وزیراعظم اور چیف جسٹس کا رحیم یار خان میں مندر پر حملے کا نوٹس

 اسلام آباد: وزیر اعظم عمران خان نے رحیم یار خان میں مندر پر حملے میں ملوث ملزمان کی گرفتاری کا حکم دے دیا ساتھ ہی چیف جسٹس نے نوٹس لیتے ہوئے کیس سماعت کے لیے مقرر کردیا۔

وزیر اعظم عمران خان نے ٹویٹ کرتے ہوئے رحیم یار خان میں مندر پر ہونے والے حملے کی شدید مذمت کی۔ وزیراعظم نے آئی جی پنجاب کو مندر پر حملے میں ملوث ملزمان کو گرفتار کرنے کا حکم دیا۔

عمران خان نے مندر کی حفاظت میں غفلت برتنے پر پولیس کے خلاف سخت ایکشن کی ہدایت کرتے ہوئے کہا کہ حکومت متاثرہ مندر کو جلد بحال کرے گی۔

Strongly condemn attack on Ganesh Mandir in Bhung, RYK yesterday. I have already asked IG Punjab to ensure arrest of all culprits & take action against any police negligence. The govt will also restore the Mandir.

— Imran Khan (@ImranKhanPTI) August 5, 2021

چیف جسٹس نے چیف سیکریٹری اور آئی جی پنجاب کو طلب کرلیا

دریں اثںا چیف جسٹس آف پاکستان جسٹس گلزار احمد نے بھی مندر کو جلانے کا از خود نوٹس لیتے ہوئے چیف سیکریٹری اور آئی جی پنجاب کو طلب کرلیا۔

سپریم کورٹ کے اعلامیے میں کہا گیا ہے کہ ہندو رہنما ڈاکٹر رمیش کمار نے چیف جسٹس سے ملاقات کی اور مندر کو جلانے سے متعلق آگاہ کیا جس پر چیف جسٹس نے نوٹس لیتے ہوئے کیس سماعت کے لیے مقرر کردیا۔

کیس کی سماعت جمعہ کو ہوگی۔ چیف جسٹس کی سربراہی میں دو رکنی بینچ سماعت کرے گا۔ چیف جسٹس نے نوٹس جاری کرتے ہوئے آئی جی پنجاب چیف سیکریٹری پنجاب سے رپورٹس بھی طلب کرلیں۔