لاہور میں چنگچی میں لڑکی سے پیش آئے واقعے کا مقدمہ درج

ویب ڈیسک  ہفتہ 21 اگست 2021
ملزموں کو ٹریس کرنے کے لیے سیف سٹی کیمروں کی مدد لی جارہی ہے۔

ملزموں کو ٹریس کرنے کے لیے سیف سٹی کیمروں کی مدد لی جارہی ہے۔

 لاہور: چنگ چی رکشے میں خاتون سے اوباش نوجوان کی بدتمیزی کے واقعے کا مقدمہ تھانہ لاری اڈہ میں درج کر لیا گیا۔

مقدمہ ایس ایچ او تھانہ لاری اڈہ غلام عباس کی مدعیت میں درج کیا گیا جس کے مطابق دو لڑکیاں اور ایک چھوٹی بچی رکشے کی عقبی نشست پر بیٹھی تھیں، 10 سے 12 اوباش لڑکے خواتین پر آوازیں کستے رہے اور غیر اخلاقی اشارے کئے، سرکلر روڈ گریٹر اقبال پارک کے نزدیک سے گزرتے ہوئے اوباش لڑکوں نے لڑکیوں کا پیچھا شروع کر دیا۔

یہ بھی پڑھیں: لاہور میں چنگچی میں بیٹھی لڑکی سے اوباش نوجوان کی غیراخلاقی حرکت

سفید رنگ کی شرٹ میں ملبوس لڑکا رکشے پر سوار ہوا۔ لڑکے نے خاتون کے ساتھ دست درازی اور نازیبا حرکت کی، جس کے بعد وہ فرار ہو گیا۔

پولیس کو تاحال کسی خاتون کی شکایت موصول نہیں ہوئی ہے اور پولیس موٹرسائیکل رکشہ کے پیچھے لگی موٹرسائیکلوں کے نمبر تلاش کررہی ہے۔ موبائل ویڈیو میں نظر آنے والے نوجوانوں کی تصاویر بھی حاصل کی جارہی ہیں۔

پولیس نے مختلف مقامات پر موٹرسائیکل رکشہ ڈرائیوروں سے بھی پوچھ گچھ کی ہے اور ملزموں کو ٹریس کرنے کے لیے سیف سٹی کیمروں کی بھی مدد لی جارہی ہے۔

پولیس نے ملزمان کی شناخت کے لیئے ویڈیو کا فرانزک کروانے کا فیصلہ کر لیا، جس میں ملزمان کے چہروں کی شناخت کی جائے گی، اور جائے وقوعہ کا تعین بھی کیا جائے گا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔