کنگنا نے اشتہار میں مذہب کو استعمال کرنے پر عالیہ کو آڑے ہاتھوں لے لیا

ویب ڈیسک  منگل 21 ستمبر 2021
مصنوعات بیچنے کے لیے اشتہار میں مذہب اور سیاست کا استعمال کرنا درست نہیں، کگنا رناوت - فوٹو:فائل

مصنوعات بیچنے کے لیے اشتہار میں مذہب اور سیاست کا استعمال کرنا درست نہیں، کگنا رناوت - فوٹو:فائل

 ممبئی: بالی وڈ اداکارہ کنگنا رناوت نے ٹیلی ویژن اشتہار میں مذہب کو استعمال کرنے پر اداکارہ عالیہ بھٹ کو آڑے ہاتھوں لے لیا۔

اداکارہ عالیہ بھٹ حال ہی میں ایک اشتہار میں نظر آئی ہیں جس میں وہ دلہن بن کر اپنے ہونے والے شوہر کے ہمراہ بیٹھ کر یہ کہہ رہی ہیں کہ مجھے گھر والے اکثر کہا کرتے تھے کہ تمہیں ایک دن اس گھر سے رخصت ہونا ہے، کیا میں کوئی شے ہوں جو کسی کو عطیہ کی جاؤں گی؟

اشتہار میں اداکارہ نے ہندو رسم ’کنیادان‘ کو بھی ادا کرنے سے انکار کیا ہے۔ اداکارہ کنگنا رناوت نے اشتہار پر ردعمل دیتے ہوئے برہمی کا اظہار کیا۔

کنگنا رناوت نے اپنی انسٹاگرام پوسٹ میں کہا کہ مصنوعات بیچنے کے لیے اشتہار میں مذہب کا استعمال، اقلیت و اکثریت کی سیاست کرنا درست نہیں، ایسے اشتہارات کے ذریعے صارفین کو جال میں پھنسانے کا سلسلہ فوری طور پر بند ہونا چاہیے۔

 کنگنا رناوت نے اس سے پہلے بھی عالیہ بھٹ کے ایک اشتہار پر تنقید کی تھی۔ کنگنا رناوت کا کہنا تھا کہ میں نے عالیہ بھٹ کو مشورہ دیا ہے کہ وہ خود کو پہچانے۔ اداکارہ نے عالیہ بھٹ کو معروف فلم ہدایت کار کرن جوہر کی کٹھ پتلی قرار دیا تھا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔