شہرمیں بم حملے اورٹارگٹ کلنگ معمول بن چکی ہے،متحدہ

کراچی: متحدہ قومی موومنٹ کی رابطہ کمیٹی نے کراچی میں پیرآباد کے علاقے میں بم دھماکے، سہراب گوٹھ کے علاقے میں پولیس موبائل اورمیڑو ول سائٹ میں ایک گاڑی پردہشتگردوں کے دستی بموں سے حملے کی سخت مذمت کی ہے اوردہشتگردی کے ان واقعات کوشہرکاامن سبوتاژکرکے ملک کوعدم استحکام سے دوچارکرنے کی گھناؤنی سازشوں کا تسلسل قراردیاہے۔

رابطہ کمیٹی نے کہاکہ شہر میں کے مختلف علاقوں میں ایک دن کئی میں بم دھماکے اور دستی بموں سے حملے پرامن شہریوں کیلیے باعث تشویش اورشہر میں جاری ٹارگٹڈآپریشن پرسوالیہ نشان ہیں۔رابطہ کمیٹی نے بم دھماکے اور دستی بم حملوں میں زخمی ہونے والے افرادسے دلی ہمدردی کااظہارکیااوران کی جلدومکمل صحت یابی کیلیے دعاکی۔ رابطہ کمیٹی نے وفاقی اورصوبائی حکومت سندھ سے مطالبہ کیاکہ کراچی میں بم دھماکا اوردستی بموں کے مسلسل حملوں کا سنجیدگی سے نوٹس لیاجائے،دہشت گردی اوراس میں ملوث سفاک دہشتگردوں کو عملی طور پر قانون کی گرفت میں لیا جائے، ان کی کمین گاہوں کا خاتمہ کیاجائے۔

دریں اثنا متحدہ قومی موومنٹ کی رابطہ کمیٹی نے مسلح دہشت گردوں کی فائرنگ سے پروفیسرسیداصغر علی زیدی کے جاں بحق اوران کے اہلیہ شاہانہ کے زخمی ہونے کے واقعے کی شدیدمذمت کی ہے۔ایک بیان میں رابطہ کمیٹی نے واقعہ کو فرقہ وارانہ فسادات کو ہوا دینے کی سازش قراردیااور حکومت سے مطالبہ کیاکہ واقعے کافی الفور نوٹس لیاجائے اوراس میں ملوث سفاک دہشت گردوں کو گرفتار کر کے مرحوم کے اہل خانہ کوانصاف فراہم کیاجائے۔