امریکا میں خطرناک منشیات برآمد جو 5 کروڑ افراد کو ہلاک کرسکتی تھی

ویب ڈیسک  اتوار 26 ستمبر 2021
برآمد ہونے والے کیمیکل کو کسی دوسرے نشے کے ساتھ ملایا جائے تو یہ 5 کروڑ افراد کو ہلاک کرنے کے لیے کافی ہے، پولیس۔(فوٹو: نیو یارک پوسٹ)

برآمد ہونے والے کیمیکل کو کسی دوسرے نشے کے ساتھ ملایا جائے تو یہ 5 کروڑ افراد کو ہلاک کرنے کے لیے کافی ہے، پولیس۔(فوٹو: نیو یارک پوسٹ)

کیلی فورنیا: امریکی پولیس نے منشیات کے دو اسمگلروں کو گرفتار کر کے خطرناک نشے آور کیمیکل بھاری مقدار میں برآمد کرلیا جو کہ 5 کروڑ افراد کو موت سے ہم کنار کرنے کے لیے کافی ہے۔

العربیہ نیوز کے مطابق امریکی ریاست کیلی فورنیا کے جنوب میں واقع قصبے پیرس میں پولیس حکام نے کارروائی کرتے  ہوئے دو ملزمان 30 سالہ ایندریس جیسز مورلیس اور 27 سالہ الیسا کرسٹائن کو گرفتار کر کے ان سے 21 کلو گرام نشے آور کیمیکل Carfentanil برآمد کرلیا، یہ مصنوعی طور پر بنایا گیا طاقت ور نشہ آور کیمکل ہے جو ہیروئین کی تیاری میں استعمال ہونے والے کیمیکل fentanyl سے 100 گنا زائد خطرناک ہے۔

ریور سائیڈ پولیس ڈیپارٹمنٹ کی جانب سے جاری ہونے والی پریس ریلیز کے مطابق ملزمان سے برآمد ہونے والے نشہ آور کیمکل Carfentanil کو خطرناک نشے ایلیفینٹ کی تیاری میں استعمال کیا جاتا ہے۔ اگر برآمد ہونے والے 21 کلو گرام کیمیکل کو کسی دوسرے نشے کے ساتھ ملایا جائے تو یہ 5 کروڑ افراد کو موت سے ہم کنار کرنے کے لیے کافی ہوگا۔

پریس ریلیز میں بتایا گیا ہے کہ ملزمان سے21کلو Carfentanil کے علاوہ 4 کلو کوکین اور 1 کلو ہیروئین بھی برآمد کی گئی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔