زرمبادلہ کے ذخائر میں ایک ارب 64 کروڑ 60 لاکھ ڈالر کی کمی

ویب ڈیسک  جمعرات 21 اکتوبر 2021
سرکاری ذخائر کی مالیت 17 ارب 49 کروڑ 22 لاکھ ڈالر کی سطح پر آگئی ہے، اسٹیٹ بینک آف پاکستان۔(فوٹو: فائل)

سرکاری ذخائر کی مالیت 17 ارب 49 کروڑ 22 لاکھ ڈالر کی سطح پر آگئی ہے، اسٹیٹ بینک آف پاکستان۔(فوٹو: فائل)

 کراچی: غیرملکی قرضوں اور پاکستان انٹرنیشنل سکوک کی ادائیگی کے سبب زرمبادلہ کے ذخائرمیں بڑی کمی ہوگئی ہے۔ 

اسٹیٹ بینک آف پاکستان کے مطابق غیرملکی قرضوں اور پاکستان انٹرنیشنل سکوک کی ادائیگی کی وجہ سے 15 اکتوبر کو ختم ہونے والے کاروباری ہفتے کے دوران زر مبادلہ کے سرکاری ذخائر ایک ارب 64 کروڑ 60 لاکھ ڈالر کم ہوگئے ہیں۔ سرکاری ذخائر کی مالیت 17 ارب 49 کروڑ 22 لاکھ ڈالر کی سطح پر آگئی ہے ، 15 اکتوبر کو ختم ہونے والے ہفتے کے دوران زرمبادلہ کے ذخائر 24 ارب 32 کروڑ 74 لاکھ ڈالر کی سطح پر آگئے۔

مرکزی بینک کے مطابق گزشتہ ہفتے ایک ارب ڈالر کے پاکستان انٹرنیشنل سکوک کی ادائیگی کی گئی، کمرشل بینکوں کے ذخائر ایک ہفتے میں 6 ارب 83 کروڑ 10 لاکھ سے بڑھ کر 6 ارب 83 کروڑ 52 لاکھ ڈالر کی سطح پر آگئے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔