جنوبی افریقا نے ویسٹ انڈیز کو شکست دیدی

ویب ڈیسک  منگل 26 اکتوبر 2021
جنوبی افریقا کی جانب سے ایڈن مارکرم 51 اور وین ڈار ڈاسن 43 رنز پر ناقابل شکست رہے - فوٹو؛ آئی سی سی

جنوبی افریقا کی جانب سے ایڈن مارکرم 51 اور وین ڈار ڈاسن 43 رنز پر ناقابل شکست رہے - فوٹو؛ آئی سی سی

 دبئی: آئی سی سی ٹی ٹوئنٹی ورلڈ کپ میں جنوبی افریقا نے ویسٹ انڈیز کو 8 وکٹ سے شکست دے دی۔ 

دبئی میں کھیلے گئے آئی سی سی ٹی ٹوئنٹی ورلڈکپ کے 18ویں میچ میں ویسٹ انڈیز نے پہلے بیٹنگ کرتے ہوئے مقررہ 20 اوورز میں 8 وکٹ کے نقصان پر 143 رنز بنائے جو پروٹیز نے 18ویں اوور میں 2 وکٹ کے نقصان پر حاصل کرلیا۔

جنوبی افریقا کی جانب سے کپتان ڈمبا باوما  اور ریزا ہینڈرکس نے اننگز کا آغاز کیا تاہم ڈمبا پہلے ہی اوور میں 2 رنز پر رن آؤٹ ہوگئے تاہم ہینڈرکس 39 رنز کی اننگز کھیلی جس کے بعد وان ڈار ڈاسن اور ایڈن مارکرم نے 43 اور 51 رنز کی ناقابل شکست اننگز کھیلتے ہوئے ٹیم کو فتح سے ہمکنار کروایا۔

اس سے قبل جنوبی افریقہ نے ٹاس جیت کر فیلڈنگ کا فیصلہ کیا۔ ویسٹ انڈیز کے اوپنرز نے محتاط انداز میں کھیل کا آغاز کیا ہے لیکن اس کے باوجود لنڈل سمنز 16 رنز بناکر آؤٹ ہوئے، نکولس پورن اور کرس گیل نے 12،12 رنز کی اننگز کھیلیں۔

کپتان پولارڈ بھی 26 رنز ہی بناسکے، آندرے رسل صرف 5 رنز کے مہمان ثابت ہوئے، شمرون ہٹمیئر ایک ہی رن بناسکے جب کہ ڈیوائن براو 8 رنز پر ناٹ آؤٹ رہے۔ جنوبی افریقا کی جانب سے کیشومہاراج نے 2، کگیسو رباڈا اور انرچ نورکیا نے ایک ایک وکٹ حاصل کی۔

دونوں ٹیموں نے پلیئنگ الیون میں ایک ایک تبدیلی کی ہے۔ ویسٹ انڈیز نے میک کوائے کی جگہ ہائیڈن والش کو شامل کر لیا جب کہ جنوبی افریقہ سے ڈی کوک کی بجائے ریزا ہینڈرکس کو شامل کیا ہے۔

ورلڈ کپ میں اس سے قبل جنوبی افریقہ اور ویسٹ انڈیز دونوں ٹیمیں ایک ایک میچ ہار چکی ہیں۔ آسٹریلیا نے جنوبی افریقہ کو 5 وکٹ سے  اور انگلینڈ نے ویسٹ انڈیز کو 6 وکٹ سے شکست دی تھی۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔