چین کی طالبان کو 10 لاکھ ڈالر کی مالی امداد، مزید 50 لاکھ ڈالرکا وعدہ

بیجنگ: چین نے انسانی ہمدردی کی بنیاد پر امارت اسلامیہ افغانستان کو 10 لاکھ امریکی ڈالر کی امداد فراہم کی ہے اور مزید 50 لاکھ امریکی ڈالر دینے کا بھی وعدہ کیا ہے۔

عالمی خبر رساں ادارے قطر میں چین کے وزیر خارجہ وانگ ایی سے طالبان حکومت کے ہم منصب مولوی امیر اللہ متقی نے ملاقات کی تھی اور افغانستان کو درپیش مالی مشکلات سمیت سرحدوں کے تحفظ سے متعلق امور پر تبادلہ خیال کیا تھا۔

گزشتہ روز کی ملاقات کے بعد آج چین نے طالبان حکومت کے لیے 10 لاکھ امریکی ڈالر کی مالی امداد جاری کردی ہے جب کہ مزید 50 لاکھ کی امداد بھی جلد فراہم کی جائے گی۔

امارت اسلامیہ افغانستان نائب وزیر اطلاعات اور ترجمان طالبان ذبیح اللہ مجاہد نے 10 لاکھ امریکی ڈالر کی امداد موصول ہونے کی تصدیق کرتے ہوئے کہا ہے کہ یہ امداد خاص طور پر ادویہ اور خوراک کی کمی کو پورا کرنے میں استعمال ہوں گی۔

قبل ازیں دوحہ میں ملاقات کے دوران نائب وزیراعظم ملا عبدالغنی برادر نے چین کے وزیر خارجہ کو یقین دہانی کرائی تھی کہ افغان سرزمین چین کے خلاف استعمال نہ ہونے کی ضمانت دیتے ہیں۔ ہمسائیہ ملک سے متصل سرحد محفوظ بنایا جائے گا۔

دریں اثنا وزیر اعظم عمران خان نے بھی چین کے صدر شی جن پنگ سے ٹیلی فونک گفتگو میں افغانستان میں مالی مسائل پر گفتگو کی اور دونوں رہنماؤں نے عالمی برادری سے افغانستان کی مالی امداد کی اپیل کی تھی کیوں کہ افغانستان میں موسم سرما سے قبل ضروری سامان کی شدید قلت کا سامنا ہے۔

د اسلامي امارت د بهرنيو چارو وزیر محترم مولوي اميرخان متقي صاحب لخوا د چين د بهرنيو چارو وزیر وانګ يې ته ځنغوزي په تحفه کې ورکړل شول چې د‌ هغه له هرکلي سره مخ شو. pic.twitter.com/tVxTGAvAdM

— Zabihullah (..ذبـــــیح الله م ) (@Zabehulah_M33) October 26, 2021

خیال رہے کہ گزشتہ ماہ بھی چین نے 31 ملین امریکی ڈالر کی مالیت کا امدادی سامان افغانستان بھیجا تھا جس میں جنگ سے تباہ حال ملک کے لیے خوراک اور صحت کا سامان شامل تھا۔

واضح رہے کہ اس وقت افغانستان کے پاس غیر ملکی اثاثوں کے طور پر تقریباً 10 ارب امریکی ڈالر ہیں جو زیادہ تر بیرون ملک کھاتوں میں رکھے گئے ہیں تاہم 15 اگست کو طالبان کے حکومت سنبھالنے کے بعد سے یہ اثاثے منجمد ہیں۔