سعودی عرب میں پہلی بار خواتین کے فٹبال ٹورنامنٹ کا آغاز

ویب ڈیسک  اتوار 14 نومبر 2021
اس ٹورنامنٹ میں سولہ ٹیمیں حصہ لیں گی، فوٹو: فائل

اس ٹورنامنٹ میں سولہ ٹیمیں حصہ لیں گی، فوٹو: فائل

ریاض: سعودی عرب میں پہلی بار خاتون فٹبال ٹیموں کے درمیان ٹورنامنٹ کرایا جا رہا ہے جس میں 16 ٹیمیں حصہ لیں گی۔ 

عرب میڈیا کے مطابق سعودی فٹ بال فیڈریشن نے اعلان کیا ہے کہ 22 نومبر سے ’’فیمیل فٹبال لیگ‘‘ کے پہلے ایڈیشن کا آغاز ہو رہا ہے۔ دو مرحلوں پر مشتمل لیگ کے پہلے مرحلے میں خواتین کی 16 ٹیمیں حصہ لیں گی۔

دارالحکومت ریاض، جدہ اور دمام کی بالترتیب چھ چھ اور چار ٹیمیں حصہ لیں گے جب کہ تمام میچز بھی انہی شہروں میں کھیلے جائیں گے۔ اس مرحلے کی فاتح ٹیمیں کنگڈم فائنل چیمپئن شپ میں ناک آؤٹ مقابلے میں حصہ لے سکیں گی۔

خواتین فٹبال ٹیموں کے ناک آوٹ مقابلے آئندہ برس جدہ میں ہوں گے۔ سعودی فٹ بال فیڈریشن نے 2017 میں خواتین کے فٹ بال کو سپورٹ کرنے کے لیے یہ ٹورنامنٹ ترتیب دیا تھا۔

سعودی عرب میں خواتین کے کھیلوں پر طویل عرصے سے پابندیاں عائد تھیں لیکن ولی عہد محمد بن سلمان کے وژن 2023 کے تحت ملک میں کئی انقلابی تبدیلیوں کا آغاز کیا ہے جن میں خواتین کو اہم مقام اور اختیارات بھی دیئے جا رہے ہیں۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔