اکتوبر میں اوورسیز پاکستانیوں سے 2.5 ارب ڈالر پاکستان موصول

بزنس رپورٹر  اتوار 14 نومبر 2021
(فوٹو : فائل)

(فوٹو : فائل)

بیرون ملک سے کارکنوں کی ترسیلات زر کی بھرپور آمد کا سلسلہ جاری رہا، اکتوبر 2021ء میں 2.5 ارب ڈالر کی رقوم آئیں جو 10.2 فیصد (سال بہ سال) زیادہ اور پچھلے مہینے سے 5.7 فیصد کم ہیں۔

اسٹیٹ بینک آف پاکستان  کے مطابق جون 2020ء سے 2 ارب ڈالر سے زیادہ رہنے کے علاوہ یہ مسلسل آٹھواں مہینہ ہے کہ ترسیلات ِزر 2.5 ارب ڈالر کے قریب یا اوپر رہی ہیں۔ مجموعی طور پر مالی سال 22ء کے پہلے چار مہینوں کے دوران ترسیلات زر بڑھ کر 10.6 ارب ڈالر ہوگئی ہیں جو گزشتہ برس کی اسی مدت سے 11.9 فیصد زیادہ ہے۔

مالی سال 22ء کے پہلے چار ماہ کے دوران ترسیلات زر زیادہ تر سعودی عرب (2.7 ارب ڈالر)، متحدہ عرب امارات (2.0 ارب ڈالر)، برطانیہ (1.5 ارب ڈالر) اور امریکا (1.1 ارب ڈالر) سے آئیں۔

حکومت اور اسٹیٹ بینک کی جانب سے باضابطہ چینلز کے استعمال کی ترغیب دینے کے لیے فعال پالیسی اقدامات اور وبا کے دوران فلاحی رقوم کی منتقلی نے پچھلے سال سے ترسیلات زر کی آمد میں مسلسل بہتری میں کردار ادا کیا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔