ہم آئے نہیں لائے گئے ہیں ، پی ٹی آئی رہنما عامر لیاقت حسین

 اسلام آباد: پارلیمنٹ کے مشترکہ اجلاس میں شرکت کے موقع پر عامر لیاقت حسین کا کہنا تھا کہ ہم آئے نہیں لائے گئے ہیں۔

ایکسپریس نیوز کے مطابق قومی اسمبلی میں حکومتی بلز کی منظوری کے لیے پارلیمنٹ کا مشترکہ اجلاس جاری ہے، جس میں شرکت کے لیے حکومتی اور اپوزیشن کے ارکان پارلیمنٹ پہنچ گئے ہیں، پی ٹی آئی کے ناراض رہنما عامر لیاقت حسین بھی اجلاس میں شرکت کے لیے پہنچے تو ان سے صحافی نے سوال کیا کہ آپ تو پی ٹی آئی سے ناراض تھے آپ کیسے پہنچ گئے۔ جس پر عامر لیاقت کا کہنا تھا کہ ہم آئے نہیں لائے گئے۔

عامر لیاقت حسین سے صحافی  نے دوبارہ سوال کیا کہ آپ کیسے آگئے، تو عامر لیاقت نے جواب دیا کہ جو ہمیشہ لاتے ہیں وہی اہتمام کے ساتھ لائے ہیں۔

اس سے قبل عامر لیاقت حسین نے سماجی رابطے کی ویب سائٹ ٹویٹر پر اپنی ٹویٹ میں عمران خان کو مخاطب کرتے ہوئے کہا کہ میں آپ سے بہت پیار کرتا ہوں، لیکن میں ان بد دماغوں کی وجہ سے نہیں رہ سکتا جن کے مشورے آپ کو توڑ دیں گے، اور میں اپنے کپتان، اپنے قائد، اپنے مرشد کو پاکستان کے ٹوٹے ہوئے محافظ کے طور پر نہیں دیکھ سکتا، مجھے افسوس ہے لیکن میں آپ اور بھابھی کا آخری سانس تک دفاع کروں گا۔

For You Khan Sahib @ImranKhanPTI I love you a lot but I can not stay due to those evil minds whose advise will break you and I can not see my captain, my leader, my mentor as a broken custodian of #pakistan I am sorry but I will defend you and bhabhi till ny last breath. Love pic.twitter.com/MUlhyKPXON

— Aamir Liaquat Husain (@AamirLiaquat) October 20, 2021

اس ٹویٹ سے قبل ایک ٹویٹ میں شکوہ کرتے ہوئے عامر لیاقت حسین نے کہا کہ وزیر اعظم نے ہر ممبر سے ملاقات کی لیکن کراچی کے آئی سی او کے لیے ان کے پاس وقت نہیں، اہم ترین حلقے سے پی ٹی آئی کے لئے سیٹ لینے والے شخص نے فاروق ستار کو شکست دی، میں نے ہر بار وزیر اعظم اور خاتون اول (بھابھی) کا دفاع کیا ہے لیکن ان کے پاس وقت نہیں ہے، یہ ٹھیک ہے۔

PM met every member but not have a time for the ICON of Karachi, the man who got a seat for PTI from the most crucial constituency, defeated my old senior college Farooq Sattar, I have defended PM and First Lady (Bhabhj) every time but he have no time, it is ok

— Aamir Liaquat Husain (@AamirLiaquat) November 17, 2021