امریکا میں کرسمس پریڈ کے شرکاء کو گاڑی نے کچل دیا، 5 افراد ہلاک

 واشنگٹن: امریکا میں کرسمس پریڈ کے شرکاء کو تیز رفتار گاڑی نے کچل دیا جس کے نتیجے میں 5 افراد ہلاک اور 12 بچوں سمیت 40 افراد زخمی ہوگئے۔

امریکی میڈیا کے مطابق ریاست وسکونسن کے شہرواکیشا میں ایک کارسوار کرسمس پریڈ میں گھس گیا جس کے نتیجے میں 5 افراد ہلاک اور 40 زخمی ہوگئے۔ زخمیوں میں 12 بچے بھی شامل ہیں۔

پولیس نے ڈرائیورکو حراست میں لے کر تحقیقات شروع کردی ہیں تاہم ملزم کی شناخت ظاہر نہیں کی گئی ہے۔  پولیس حکام کا کہنا ہے کہ واقعے کی دہشتگردی سمیت تمام  پہلوؤں پر تحقیقات کی جائیں گی۔

At this time, we can confirm that 5 people are deceased and over 40 are injured. However, these numbers may change as we collect additional information. Many people have self-transported to area hospitals. The Police Department has the person of interest in custody.

— cityofwaukesha (@CityofWaukesha) November 22, 2021

سوشل میڈیا پر وائرل ہونے والی ویڈیوز میں دیکھا جا سکتا ہے کہ سرخ رنگ کی تیز رفتار گاڑی نے فٹ پاتھ پر کرسمس پریڈ کے شرکاء کو کچل دیا جب کہ دوسری ویڈیو میں پولیس کو گاڑی پر فائرنگ کرتے دیکھا جا سکتا ہے جس کے نتیجے میں گاڑی ٹریفک بیریئر سے ٹکرا کر رک جاتی ہے۔

پولیس کا مزید کہنا ہے کہ واقعے کی تحقیقات کے بعد میڈیا کو تفصیلات سے آگاہ کیا جائے گا تاحال تفتیش ابتدائی مراحل میں ہے۔