نیوزی لینڈ کی حاملہ رکن اسمبلی بچے کو جنم دینے سائیکل پر اسپتال پہنچ گئیں

ویب ڈیسک  اتوار 28 نومبر 2021
رکن اسمبلی نے ایک صحت مند بچی کو جنم دیا ہے، فوٹو: فیس بک

رکن اسمبلی نے ایک صحت مند بچی کو جنم دیا ہے، فوٹو: فیس بک

ویلنگٹن: نیوزی لینڈ کی حاملہ رکن اسمبلی جولی این جینٹر نے علی الصبح  اکیلے سائیکل چلاتے ہوئے اسپتال پہنچ کر صحت مند بچے کو جنم دیدیا۔

عالمی خبر رساں ادارے کے مطابق نیوزی لینڈ کی رکن اسمبلی جولی این جینٹر نے ایک صحت مند بچی کو جنم دیا ہے جس کے لیے انھیں خود سائیکل چلاتے ہوئے اسپتال پہنچنا پڑا تھا۔

سماجی رابطے کی ویب سائٹ پر اپنی پوسٹ میں انھوں نے لکھا کہ رات دو بجے مجھے تکلیف بڑھی تو ٹرانسپورٹ کا انتظار کیے بغیر خود سائیکل چلاتے ہوئے اسپتال پہنچ گئی۔ میں نے کبھی سوچا نہ تھا کہ زچگی کے درد کے دوران سائیکل چلاؤں گی۔

newzeland parliment 1

رکن اسمبلی نے مزید لکھا کہ اسپتال پہنچنے کے ایک گھنٹے بعد میں نے ایک صحت مند بچی کو جنم دیا جو اب بڑے مزے سے اپنے باپ کی گود میں سو رہی ہے۔ ہم اپنے گھر نئے مہمان کو خوش آمدید کہتے ہیں۔

جولی این جینٹر نے مزید لکھا کہ اسپتال گھر سے 3 منٹ کی دوری پر تھا اور شروع میں تکلیف کم تھی لیکن درد کے باعث سائیکل چلانے میں مشکل کا سامنا تھا اس لیے یہ سفر 10 سے زیادہ منٹوں پر محیط ہوگیا۔

newzeland parliment 2

رکن اسمبلی نے اپنی کیفیت کا اظہار کرتے ہوئے لکھا کہ جب میں پارکنگ میں پہنچی تو بے حد خوش تھی کہ منزل تک خیر و عافیت کے ساتھ پہنچ گئی ہوں۔

واضح رہے کہ جولی این جینٹر ٹرانسپورٹ کے بے تحاشا استعمال کے باعث آلودگی جیسے مسائل کے خلاف اُٹھاتی رہی ہیں اور لوگوں کو سائیکل کے استعمال کی ہدایت کرتی رہی ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔