’معافی مانگو ورنہ۔۔‘ کسانوں نے کنگنا کی گاڑی کو گھیرے میں لے لیا

ویب ڈیسک  جمعـء 3 دسمبر 2021
اداکارہ نے کچھ روز قبل جان سے مارنے کی دھمکیاں ملنے پر پولیس میں شکایت درج کرائی تھی - فوٹو:فائل

اداکارہ نے کچھ روز قبل جان سے مارنے کی دھمکیاں ملنے پر پولیس میں شکایت درج کرائی تھی - فوٹو:فائل

 ممبئی: بھارت میں کسانوں نے بالی وڈ اداکارہ کنگنا رناوت کی گاڑی کو گھیرے میں لے کر معافی مانگنے کا مطالبہ کیا اور شدید نعرے بازی کی۔

انڈیا ٹو ڈے کی ایک رپورٹ کے مطابق اداکارہ کنگنا رناوت نے الزام عائد کیا ہے کہ ریاست پنجاب کے شہر کیرت پور صاحب میں چنڈی گڑھ ہائی وے پر مشتعل کسانوں نے ان کی گاڑی کا گھیراؤ کیا اور ان کے خلاف شدید نعرے بازی بھی کی، پولیس نے موقع پر پہنچ کر صورتِ حال کو کنٹرول کرلیا۔

سوشل میڈیا پر وائرل تصویر میں دیکھا جا سکتا ہے کہ کسانوں کا ایک گروہ سفید رنگ کی کار کا گھیراؤ کیے کھڑا نعرے بازی کر رہا ہے تاہم کار میں کون تھا اس حوالے سے مستند معلومات نہیں۔

یہ بھی پڑھیں: کنگنا نے احتجاج کرنیوالے کسانوں کو ’خالصتانی دہشت گرد‘ قرار دے دیا

ریاست پنجاب میں کسانوں کے لیڈر راکیش تکیت نے اپنے بیان میں کہا ہے کہ کسانوں کی جانب سے کنگنا رناوت کی گاڑی کا گھیراؤ کرنے سے متعلق اطلاعات نہیں، واقعے کی مکمل تفصیلات معلوم ہونے کے بعد بیان جاری کریں گے۔

واضح رہے کہ کسانوں کو ’خالصتانی دہشت گرد‘ قرار دینے پر ملک بھر میں اداکارہ کے خلاف شدید غصہ پایا جاتا ہے۔ کچھ روز قبل کنگنا رناوت نے جان سے مارنے کی دھمکیاں ملنے پر پولیس میں شکایت درج کرائی تھی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔