ویکسین لگواؤ کرکٹ میچ دیکھنے آؤ، پالیسی جاری

اسپورٹس رپورٹر  اتوار 5 دسمبر 2021
نیشنل اسٹیڈیم میں گنجائش کے مطابق100 فیصد تماشائیوں کوآنے کی اجازت۔ فوٹو: فائل

نیشنل اسٹیڈیم میں گنجائش کے مطابق100 فیصد تماشائیوں کوآنے کی اجازت۔ فوٹو: فائل

کراچی: پاکستان اور ویسٹ انڈیز کے درمیان نیشنل اسٹیڈیم کراچی میں شیڈول سیریز کے لیے ٹکٹوں کی قیمتوں کا اعلان کردیا گیا جب کہ صرف کورونا ویکسین یافتہ افراد ہی اسٹیڈیم آ سکیں گے۔

نیشنل اسٹیڈیم میں گنجائش کے مطابق100 فیصد تماشائیوں کوآنے کی اجازت ہوگی، 13 سے 22 دسمبر تک 3 ٹی ٹوئنٹی اور اتنے ہی ون ڈے میچز ہوں گے، ٹی ٹوئنٹی ٹکٹوں کی قیمت 250 سے 2 ہزار روپے رکھی گئی ہے۔

جنرل انکلوژرز میں نشستوں انتخاب عالم، اقبال قاسم، محمد برادران، نسیم الغنی اور وسیم باری کی قیمت 250 روپے ہے،فرسٹ کلاس انکلوژرز میں آصف اقبال، ماجد خان، قائد، وقار حسن اور ظہیر عباس کے ٹکٹ 500 روپے میں ملیں گے۔

پریمیئم انکلوژرز میں عمران خان اور وسیم اکرم کی قیمت ایک ہزار روپے رکھی گئی ہے، وی آئی پی انکلوژرز میں فضل محمود، حنیف محمد اور جاوید میانداد کے ٹکٹ 2 ہزار روپے میں دستیاب ہوں گے۔

ٹکٹ آن لائن www.bookme.pk، بذریعہ ٹیلی فون یا باکس آفس اور ایم اینڈ پی آؤٹ لیٹس سے خریدے جا سکتے ہیں، میچز کے دوران نیشنل کمانڈ اینڈ آپریشن سینٹر کی گائیڈ لائن پر عمل ہوگا،12 سال سے زائد عمر کے شائقین کو مکمل طور پر ویکسین شدہ ہونا ضروری ہے،12 سال سے کم عمر بچے مبرا ہیں،اسٹیڈیم میں داخلے کے لیے ٹکٹ، قومی شناختی کارڈ اور نادرا سے جاری کردہ امیونائزیشن سرٹیفکیٹ درکار ہوگا،18، 20 اور 22 دسمبر کو ون ڈے انٹرنیشنل شیڈول ہیں۔

آئی سی سی مینز کرکٹ ورلڈ کپ سپر لیگ میں شامل ان میچز میں جنرل انکلوژرز کے ٹکٹ کی شرح 100 روپے ہے، فرسٹ کلاس انکلوژر کا ٹکٹ 250 روپے کا ہوگا، پریمیئم میں 500 اور وی آئی پی انکلوژر کا ٹکٹ ایک ہزار میں دستیاب ہوگا،شائقین کو کوویڈ19 پروٹوکول پرعمل کرنے کا مشورہ دیا گیا ہے،اسٹینڈ میں فیس ماسک پہننے کی ہدایت بھی کردی گئی۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔