آئندہ چند سالوں میں ملک میں گیس نہیں رہے گی فواد چوہدری

گیس کے ذخائر میں سالانہ 9 فیصد کمی آرہی ہے، فواد چوہدری (فوٹو : فائل)

---

حکومت نے ملک میں گیس کے ذخائر ختم ہونے کا خدشہ ظاہر کردیا، وزیر اطلاعات نے عوام کو خبردار کیا ہے کہ گیس کے ذخیروں میں سالانہ 9 فیصد کمی ہورہی ہے چند برس بعد ملک میں گیس ختم ہوجائے گی سستی گیس کے عادی افراد اپنی عادتیں بدلیں۔

وفاقی کابینہ کے اجلاس کے بعد میڈیا کو بریفنگ دیتے ہوئے وزیر اطلاعات فواد چوہدری نے گیس بحران پر کہا کہ شہروں میں رہنے والے صرف 28 فیصد لوگوں کا بوجھ 78 فیصد لوگ اٹھا رہے ہیں جو گیس سے محروم ہیں، تمام شہروں میں فراہم کی گئی گیس سبسڈی پر دی جارہی ہے اور اس کا بوجھ 78 فیصد ان لوگوں پر آرہا ہے جو کوئلہ، لکڑی اور ایل پی جی استعمال کرتے ہیں لیکن یہ سلسلہ زیادہ عرصے نہیں چلے گا۔

یہ بھی پڑھیں : سندھ حکومت ناراض ہونے کی بجائے اشیاء کی قیمتیں کنٹرول کرے، فواد چوہدری

فواد چوہدری نے عوام کو خبردار کیا کہ ملک میں ہر سال گیس کے ذخائر میں کمی واقع ہورہی ہے، پچھلے برس بھی 9 فیصد گیس کم ہوئی اور رواں سال بھی گیس کے ذخیروں میں 9 فیصد کمی آئی ہے، چند برس بعد ملک میں گیس نہیں رہے گی۔

پاکستان کے گیس ذخائر میں تیزی سے کمی ہو رہی ہے جسکی شرح 9 فیصد سالانہ ہے جبکہ 28 فیصد گھریلو صارفین کی ضروریات کو پورا کرنے کے لیئے بقیہ تمام عوام اور انڈسٹری کو بوجھ برداشت کرنا پڑتا ہے ہمیں اپنے گیس سسٹم کو دوبارہ مرتب کرنے کی اشد ضرورت ہے۔ @fawadchaudhry pic.twitter.com/zNUWCKwFU5

— PTI (@PTIofficial) December 14, 2021

انہوں ںے مزید کہا کہ بڑے شہروں میں رہنے والے وہ لوگ جو سستی گیس کے عادی ہوچکے ہیں انہیں اپنی عادتیں بدلنی ہوں گی اور حکومت کو گیس کا پورا سسٹم بدلنا ہوگا کیوں کہ توانائی کے ذخیروں پر ان 78 فیصد لوگوں کا بھی اتنا ہی حق ہے جتنا کہ بڑے شہروں میں رہنے والے 28 فیصد افراد کا ہے۔