وجیہہ سواتی قتل کیس؛ عدالت کی ملزمان کے جسمانی ریمانڈ میں 3 دن کی توسیع

راولپنڈی: عدالت نے امریکی شہری وجیہہ سواتی کے اغواء وقتل کیس کے ملزمان کے جسمانی ریمانڈ میں تین دن کی توسیع کر دی۔

پولیس نے وجہیہ سواتی اغواء وقتل کیس کے ملزمان کو مزید جسمانی ریمانڈ مکمل ہونے پر عدالت پیش کردیا۔

پولیس نے عدالت میں موقف اختیار کرتے ہوئے کہا ملزمان سے آلہ قتل اور لاش لکی مروت منتقل کرنے والی گاڑی برآمد کرنی ہے۔

یہ بھی پڑھیں: راولپنڈی سے اغوا پاکستانی نژاد امریکی خاتون کیس میں سابق شوہر گرفتار

عدالت نے ملزمان رضوان حبیب، حریت اللہ اور سلطان خان کے جسمانی ریمانڈ میں تین دن کی توسیع کر دی۔ ملزمان کا ریمانڈ سول جج طارق خان کی عدالت سے حاصل کیا گیا۔ پولیس ملزمان کو سخت سیکورٹی میں لے کر واپس تھانہ سول لائنز روانہ ہوگئی۔

یہ بھی پڑھیں: شوہر کے ہاتھوں قتل امریکی خاتون وجیہہ سواتی کا پوسٹ مارٹم مکمل

واضح رہے کہ 2 ماہ قبل خاتون وجیہہ سواتی اغواء ہوئی تھی، ان کے تین کم عمر بچے امریکا میں ہیں، وجیہہ سواتی اپنے شوہر رضوان حبیب سے جائیداد کا معاملہ حل کرنے پاکستان آئی تھی۔ وجیہہ کے سابق شوہر نے اسے قتل کرنے کا اعتراف کیا تھا، اور بتایا کہ اس نے اپنی سابقہ اہلیہ کو پاکستان پہنچتے ہی اغوا کیا تھا، اور اسے قتل کرکے لاش ڈیرہ اسماعیل خان کے علاقے لکی مروت میں دفنائی ہے۔