کراچی چڑیا گھر کی ہتھنی مدھو بالا 16 سال کی ہوگئی

 کراچی: چڑیا گھر میں موجود ہتھنی مدھو بالا 16 سال کی ہوگئی۔ ہتھنی کی 16ویں سالگرہ چڑیا گھر کے ہاتھی گھر میں منائی گئی، تقریب کے مہمان خصوصی ایڈمنسٹریٹر کراچی بیرسٹر مرتضیٰ وہاب تھے۔

ایکسپریس نیوز کے مطابق سالگرہ کی تقریب سے خطاب کرتے ہوئے ایڈمنسٹریٹر کراچی مرتضیٰ وہاب نے کہا کہ کے ایم سی نے ڈھیر سارے بچوں کے ہمراہ اپنے چڑیا گھر کی ہتھنی مدھو بالا کی سالگرہ منفرد انداز سے منائی ہے اور میں نے بچوں کے چہروں پر جو خوشی اور مسکراہٹ دیکھی ہے وہ واقعی قابل تعریف ہے۔

انہوں نے کہا کہ میں خود بھی ہتھنی مدھو بالا کو اس کی سالگرہ کی مبارکباد پیش کرتا ہوں، پچھلے ایک ماہ کے دوران کراچی چڑیا گھر میں بڑے اچھے انداز میں کام ہوا ہے، نئی انتظامیہ خاصی فعال ہے، آج کل بچوں کی چھٹیاں ہیں، ہزاروں کی تعداد میں بچے، بچیاں اور ان کے گھر والے کراچی چڑیا گھر میں بہترین تفریح سے لطف اندوز ہو رہے ہیں اور یہ ہتھنی کی سالگرہ منعقد کرنے کا بہترین موقع تھا۔

مرتضیٰ وہاب نے کہا کہ ہم نے کراچی شہر میں رونقیں بحال کرنے کا جو سلسلہ شروع کیا ہے بہتری کا یہ سفر اسی طریقے سے جاری و ساری رہے گا، کراچی والوں کو خود نظر آرہا ہے کہ جن لوگوں نے ان سے ووٹلیے انہوں نے کیا کیا اور ہم کیا کر رہے ہیں، کراچی میں رہنے والا ہر فرد کہے گا کہ پچھلے چند مہینوں میں کراچی میں پائیدار ترقی کا دور شروع ہوا ہے اور آج کراچی بہتر سمت میں رواں دواں ہے، جہاں تک بلدیاتی قانون کا سوال ہے جن کا دل کالا ہے وہ اسے شوق سے کالا قانون کہتے رہیں اور دھرنے دیتے رہیں مگر وقت ثابت کرے گا کہ یہ قانون کس طرح کراچی میں بلدیاتی نظام کو مضبوط کر رہا ہے، پاکستان پیپلز پارٹی کراچی میں بہتری اور ترقی کے لئے کام کرتی رہے گی۔

ایڈمنسٹریٹر کراچی نے کہا کہ کراچی چڑیا گھر میں ترقیاتی کاموں کا سلسلہ تیز کیا جائے گا اور یہاں آنے والے شہریوں کو زیادہ سے زیادہ سہولیات فراہم کی جائیں گی کیونکہ چڑیا گھر شہریوں کی تفریح کا بہترین ذریعہ ہے۔

ایک سوال کے جواب میں انہوں نے کہا کہ پی ٹی آئی کی سیاست کو عوام نے مسترد کردیا ہے، کراچی میں بھی اور دیگر جگہوں پر بھی انہیں اب پشیمانی سامنا کرنا پڑ رہا ہے۔

بعدازاں ایڈمنسٹریٹر کراچی مرتضیٰ وہاب نے چڑیا گھر کے مختلف حصوں کا دورہ اور وہاں آئے ہوئے لوگوں اور ان کے بچوں سے بات چیت کی۔