دنیا کا سب سے بڑا فرائی پین 18 فٹ لمبا ہے!

ویب ڈیسک  ہفتہ 15 جنوری 2022
اس فرائی پین کو منزلِ مقصود تک پہنچانے کےلیے ایک بڑا ٹرالر استعمال کیا گیا ہے۔ (فوٹو: سوشل میڈیا)

اس فرائی پین کو منزلِ مقصود تک پہنچانے کےلیے ایک بڑا ٹرالر استعمال کیا گیا ہے۔ (فوٹو: سوشل میڈیا)

پٹس برگ: سوشل میڈیا پر آج کل دنیا کے سب سے بڑے فرائی پین کے چرچے ہیں جو 18 فٹ لمبا اور 14,360 پونڈ (6.5 ٹن) وزنی ہے جبکہ اسے ڈھلواں لوہے (کاسٹ آئرن) سے بنایا گیا ہے۔

چند روز قبل اسے امریکی شہر پٹس برگ کی ایک مرکزی شاہراہ پر ایک بڑے ٹرالر میں جاتے ہوئے دیکھا گیا اور سوشل میڈیا صارفین نے حیران ہو کر فوراً اس کی تصویریں بھی شیئر کرا دیں۔

خبروں سے معلوم ہوا ہے کہ دنیا کے اس سب سے بڑے فرائی پین کو ’لاج کاسٹ آئرن میوزیم‘ میں نمائش کےلیے رکھا جائے گا جو جنوبی پٹس برگ میں زیرِ تعمیر ہے۔

ہینڈل سے لے کر مخالف سرے تک اس کی لمبائی 18 فٹ ہے لیکن اب تک گنیز ورلڈ ریکارڈ میں اندراج کےلیے اس حوالے سے کوئی درخواست جمع نہیں کروائی گئی ہے۔

’لاج کاسٹ آئرن میوزیم‘ میں ڈھلواں لوہے کی مختلف مصنوعات اور ان کی تیاری کے مراحل بطور نمائش رکھے جائیں گے جبکہ یہ دیوقامت فرائی پین اس عجائب گھر کے باہر نصب کیا جائے گا تاکہ لوگوں کو اس طرف متوجہ کیا جاسکے۔

توقع ہے کہ یہ میوزیم اس سال مئی یا جون تک مکمل ہوجائے گا اور عوام کےلیے کھول دیا جائے گا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔