بھارت میں مسلم طالبات کو حجاب کرنے پر کلاس سے نکال دیا گیا

بنگلورو: بھارت میں ایک کالج  نے حجاب اور دستانے پہننے پر 6 مسلم طالبات کو کلاس سے بے دخل کر کے اُن کا داخلہ مکمل بند کردیا۔ 

بھارتی ریاست کرناٹکا کے ضلع ادوپی میں قائم گرلز کالج میں زیر تعلیم 18 سالہ الماس اور اُن کی 5 دوستوں کو کلاس ٹیچر نے حجاب پہننے پر کلاس سے باہر نکال کر داخلے پر مکمل پابندی عائد کردی۔

الماس نامی طالبہ نے بتایا کہ ’جب میں کلاس کے دروازے پر پہنچی تو ٹیچر نے کہا کہ ہم حجاب کے ساتھ کلاس میں داخل نہیں ہوسکتے، اگر کمرے میں بیٹھنا ہے تو اسے اتارنا ہوگا‘۔

انہوں نے کہا کہ حجاب اور دستانے ہمارے ایمان کا حصہ اور یہ ہمیں تحفظ فراہم کرتا ہے، جب ان پر پابندی نہیں تو انتظامیہ کیوں ہم پر دباؤ ڈال رہی ہے۔

Standoff continues at #Udupi girls college over the #HijabisOurRight issue. 4 Students still not being allowed to enter class.Principal Rudre Gowda has called for parents meet next week. Says rules need to be followed. No exception.@CampusFrontInd has supported these students. pic.twitter.com/VnxgMjBw1h

— Imran Khan (@KeypadGuerilla) January 15, 2022

طالبات نے کہا کہ انتظامیہ دباؤ میں لاکر ہمیں بے حجاب کرنا چاہتی ہے مگر وہ اس میں کامیاب نہیں ہوگی کیونکہ ہم اس معاملے میں کسی قسم کا کوئی دباؤ برداشت نہیں کریں گے۔

طالبات نے بتایا کہ اکتیس دسمبر کے بعد سے ہم سیڑھیوں پر بیٹھ کر پڑھنے پر مجبور ہیں، ہمیں کلاس میں بیٹھنے کی اجازت نہیں دی جارہی جبکہ ٹیچر ہماری غیر حاضری شمار کررہی ہیں۔

کالج انتظامیہ نے طالبات کے احتجاج پر ٹیچر کا دفاع کرتے ہوئے کہا کہ حجاب اور دستانے یونیفارم کا حصہ نہیں، ان کے بغیر ہی کلاس میں داخلے کی اجازت دی جاسکتی ہے۔

دوسری جانب کالج پرنسپل گودوا نے کہا کہ کلاس روم میں حجاب پہننے کی اجازت نہیں اور نہ ہی یہ ہمارے یونیفارم کا حصہ ہے۔ انہوں نے کہا کہ ہم وزارتِ تعلیم کی ہدایت کی روشنی میں ہی اقدامات کرتے ہیں۔