ٹیم کی روانگی سے 2 روز قبل سیکیورٹی افسر ڈھاکا جائے گا

اسپورٹس ڈیسک  ہفتہ 15 فروری 2014
کھلاڑیوں کوبنگلہ دیش میں قیام کے دوران غیرمعمولی طور پرمحتاط رہنے کی تاکید۔ فوٹو: فائل

کھلاڑیوں کوبنگلہ دیش میں قیام کے دوران غیرمعمولی طور پرمحتاط رہنے کی تاکید۔ فوٹو: فائل

کراچی: ایشیا کپ میں شرکت کیلیے پاکستانی ٹیم22 فروری کو ڈھاکا روانہ ہو گی، اس سے 2روز قبل پی سی بی اپنا سیکیورٹی افسر صورتحال کا جائزہ لینے کیلیے بنگلہ دیش بھیجے گا، ٹیم کو وہاں قیام کے دوران سیکیورٹی کے سلسلے میں غیرمعمولی طور پر محتاط رہنے کی تاکید بھی دی گئی ہے۔

یاد رہے کہ ٹیم کو ایشیا کپ اور آئی سی سی ورلڈ ٹی ٹوئنٹی میں شرکت کے لیے بنگلہ دیش جانے کی کلیئرنس چند روز قبل ہی ملی، وزارت خارجہ نے اس بارے میں کرکٹ بورڈ کو آگاہ کیا۔ یاد رہے کہ بنگلہ دیش میں جماعت اسلامی کے رہنما عبدالقادر ملاّ کو سزائے موت دیے جانے پر پاکستانی حکومت کے سخت ردعمل کے جواب میں وہاں پاکستان مخالف مظاہرے ہوئے تھے، جس کے بعد گرین شرٹس کی ایشیا کپ اور ورلڈ ٹی ٹوئنٹی میں شرکت حکومتی اجازت سے مشروط کردی گئی تھی۔

4 فروری کو سابق چیئرمین پی سی بی ذکا اشرف نے امورِ خارجہ کے مشیر سرتاج عزیز سے ملاقات کی تھی، جس میں انھیں بتایا گیا تھا کہ اس ضمن میں سمری وزیرِ اعظم کو بھیجی جا رہی ہے، اب ٹیم کو اجازت مل گئی ہے۔ یاد رہے کہ ایشیا کپ 25 فروری سے 8 مارچ تک کھیلا جائے گا جبکہ آئی سی سی ورلڈ ٹی ٹوئنٹی کا انعقاد16 مارچ سے 6اپریل تک ہونا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔