موٹروے پولیس نے سڑک پر پڑے 7 لاکھ روپے کے زیورات مالک تک پہنچا دیے

 اسلام آباد: موٹروے پولیس نے فرض شناسی و دیانت داری کی مثال قائم کردی دوران سفر سڑک پر گرنے والا بیگ زیورات و نقدی سمیت تلاش کرکے مالکان کے حوالے کردیا.

حکام کے مطابق موٹروے پر اسلام آباد سے فیملی کے ہمراہ پشاور جانے والے ابصار نامی شہری فون کال سننے کے لیے روکے تو دروازہ کھلنے پر بچے کا پاؤں لگنے سے لیڈیز بیگ سڑک پر گر گیا جسکا علم فیملی کو نہ ہوا اور انھوں نے سفر جاری رکھا۔ کچھ وقت بعد موٹر وے پولیس کے پیٹرولنگ انسپکٹر امتیاز احمد اور سب انسپکٹر شیرین تاج موقع سے گزرے تو ان کی نظر پرس پر پڑی۔

موٹر وے پولیس نے اسے حفاظتی تحویل میں لیکر تلاشی لی تو بیگ سے پانچ تولہ سونے کے زیورات اور ستر ہزار روپے نقد اور اہم کاغذات ملے ۔ کاغذات میں موجود فون نمبر کے ذریعے فیملی کو ٹریس کرکے بیگ تمام املاک سمیت ان کے حوالے کردیاگیا۔

قیمتی اشیاء واپس ملنے پر فیملی نے موٹر وے پولیس کا شکریہ ادا کیا ۔ ڈی آئی جی موٹروے نارتھ زون مظہر الحق کاکا خیل اور سیکٹر کمانڈر ایم ون ذیشان حیدر نے افسران کی کارکردگی کو سراہا اور انھیں انعامات دینے کا اعلان کیا ۔