گھانا میں دھماکے سے 17 افراد ہلاک، 59 زخمی

ویب ڈیسک  جمعـء 21 جنوری 2022
دھماکہ اتنا شدید تھا کہ ارد گرد کی درجنوں عمارتیں بھی زمین بوس ہوگئیں۔ (فوٹو: انٹرنیٹ)

دھماکہ اتنا شدید تھا کہ ارد گرد کی درجنوں عمارتیں بھی زمین بوس ہوگئیں۔ (فوٹو: انٹرنیٹ)

اکرا: گھانا کے شہر بوگوسو میں موٹر سائیکل اور ٹرک میں تصادم سے ہونے والے ہولناک دھماکے میں اب تک 17 افراد ہلاک جبکہ 59 زخمی ہوچکے ہیں۔

خبر رساں ایجنسیوں کے مطابق، موٹر سائیکل سے ٹکرانے والے ٹرک میں دھماکہ خیز مواد سے بھری درجنوں پیٹیاں رکھی تھیں جنہیں کان کنی کی غرض سے لے جایا جارہا تھا۔

دھماکہ اتنا شدید تھا کہ زمین میں کئی فٹ گہرا گڑھا پڑ گیا جبکہ ارد گرد کی درجنوں عمارتیں بھی زمین بوس ہوگئیں۔

گنجان آباد علاقے کی وجہ سے دھماکے میں شدید تباہی پھیلی جس سے زیادہ جانی نقصان ہوا اور حادثے کی جگہ سے اٹھنے والے دھوئیں اور راکھ کے بادل نے ایک وسیع علاقے کو اپنی لپیٹ میں لے لیا۔

گھانا حکام کے کا کہنا ہے کہ امدادی کارروائیاں مکمل ہوچکی ہیں تاہم زخمی ہونے والے کئی افراد کی حالت نازک ہے جس کے باعث اموات کی تعداد بڑھنے کا خدشہ ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔