فکسنگ کیس: کمیٹی نے کل شعیب ملک کو طلب کرلیا

لاہور: میچ فکسنگ اسکینڈل کی تحقیقات کرنے والی کمیٹی نے عمران نذیر اور بلاول بھٹی کے بیانات ریکارڈ کرلیے، پیر کو شعیب ملک سمیت مزید 4کرکٹرز کو بلایا جائیگا،حتمی رپورٹ ایک ہفتے میں متوقع ہے۔

تفصیلات کے مطابق سابق ٹیسٹ کرکٹر باسط علی، سرفراز نواز اور دیگر نے قومی ٹوئنٹی 20 ٹورنامنٹ کے دوران سیالکوٹ اسٹالینز اور کراچی ڈولفنز کا میچ فکسڈ ہونے کا الزام لگایا تھا، جس پر شعیب ملک الیون کا شدید احتجاج بھی سامنے آیا،ٹیم نے سیاہ پٹیاں باندھ کر کوارٹر فائنل میں حصہ لیا، اس حوالے سے شام کو پریس کانفرنس کا بھی اعلان گیا تھا لیکن چیئرمین پی سی بی نجم سیٹھی کے فون پر شعیب ملک نے تفصیلی بات چیت سے گریز کیا، انھوں نے صرف اتنا کہا کہ ’’کہنے کو تو بہت کچھ ہے لیکن ملک کی عزت کے خاطر خاموش رہوں گا، اب فیصلہ بورڈ ہی کرے گا‘‘۔

بعد ازاں پی سی بی نے معاملے کی تحقیقات کیلیے 3رکنی کمیٹی قائم کردی جس میں شفیق پاپا،کرنل(ر) وسیم اور علی نقوی شامل ہیں۔ ذرائع کے مطابق کمیٹی نے میچ کے ویڈیوز غور سے دیکھنے کے بعد عمران نذیر اور بلاول بھٹی کے بیانات ریکارڈ کرلیے، شعیب ملک سمیت مزید 4 کرکٹرز کو پیر کے روز طلب کیا گیا ہے، میچ ریفری اور باسط علی سے بھی تفصیلات جاننے کے بعد فکسنگ الزامات کا ہر پہلوسے جائزہ لے کر ایک ہفتے میں رپورٹ پی سی بی حکام کے حوالے کردی جائے گی ۔