پاکستان انگلینڈ کو شکست دے کر انڈر 19 ورلڈ کپ کے فائنل میں پہنچ گیا

دبئی: انڈر 19 ورلڈ کپ کے سیمی فائنل میں پاکستان نے انگلینڈ کو سنسنی خیز مقابلے کے بعد 3 وکٹوں سے شکست دے کر فائنل کے لئے کوالیفائی کرلیا۔

دبئی میں کھیلے گئے انڈر 19 ورلڈ کپ کے پہلے سیمی فائنل میں ٹاس جیت کر بلے بازی کرتے ہوئے انگلینڈ کی ٹیم نے مقررہ 50 اوورز میں 7 وکٹوں کے نقصان پر پاکستان کو 205 رنز کا ہدف دیا تاہم اس کے جواب میں پاکستان نے7 وکٹوں کے نقصان پر 50 ویں اوور میں ہدف مکمل کرلیا۔ پہلے بیٹنگ کے دوران انگلینڈ کے بلے باز پاکستانی بالرز کے سامنے کچھ خاص کارکردگی نہ دکھا سکے اور ٹاپ آڈر کے 2 بلے باز بغیر کوئی رنز بنائے ہی پویلین لوٹ گئے تاہم ریان ہگنز نے 52 رنز بنا کر اپنی ٹیم کو سہارا دیا جب کہ کپتان ول رہوڈز 76 رنز بنا کر نمایاں رہے۔ بالنگ کے دوران پاکستان کی جانب سے ضیاالحق، احمد بٹ اور کرامت علی نے انگلینڈ کے 2، 2 کھلاڑیوں کو اپنا شکار بنایا جب کہ کامران غلام نے ایک بلے باز کو پویلین کی راہ دکھائی۔

ہدف کے تعاقب میں پاکستانی ٹیم نے بلے بازی کا آغاز کیا تو ابتدا میں قومی ٹیم مشکلات کا شکار رہی تاہم سنسنی خیز مقابلے کے بعد پاکستانی شاہینوں نے آئی سی سی پر اجارہ داری قائم کرنے والے انگلینڈ کو 3 وکٹوں سے شکست دے کر میگا ایونٹ سے باہر کردیا۔ بلے بازی کے دوران پاکستان کے سعود شکیل 45، ظفر گوہر 37، امیر حمزہ 35، امام الحق 28 اور احمد بٹ 26 رنز بنا کر نمایاں رہے۔

واضح رہے کہ ہفتے کے روز پاکستان نے شاندار کھیل کا مظاہرہ کرتے ہوئے سری لنکا کو شکست دے کر سیمی کے لئے کوالیفائی کیا تھا جب کہ ایک دوسرے میچ میں انگلینڈ نے بھارت کو شکست دے کر ایونٹ سے باہر کردیا تھا۔