تازہ ترین

قومی اسمبلی میں عمران خان کے خلاف ووٹ دوں گا، عامر لیاقت حسین

کھل کر کہتا ہوں میں نے کسی سے پیسے نہیں لیے کسی سے ساز باز نہیں کی میں آپ کے خلاف ووٹ دوں گا، عامر لیاقت

ویب ڈیسک بدھ 6 اپريل 2022

197 اراکین اسمبلی غدار ہیں آپ کی وجہ سے،عامر لیاقت حسین فوٹوفائل

کراچی: قومی اسمبلی کے رکن اور ٹی وی میزبان عامر لیاقت حسین نے ایک ویڈیو پیغام میں کہا ہے کہ وہ قومی اسمبلی میں عمران خان کے خلاف ووٹ دیں گے۔

عامر لیاقت حسین نے گزشتہ روز اپنے سوشل میڈیا اکاؤنٹ پر ایک ویڈیو شیئر کی جس میں انہوں نے کہا آپ سب کو معلوم ہے کہ اس وقت ملک میں ایک خطرناک قسم کا آئینی بحران ہے۔ مجھے امید ہے کہ آج سماعت کے دوران جناب چیف جسٹس عمر عطا بندیال صاحب لارجر بینچ کی روشنی میں اسملبلیاں بحال کردیں گے۔

عامر لیاقت نے کہا میں بہت دکھ اور تکلیف کے ساتھ کہہ رہا ہوں کہ میں نے خان صاحب کا ساتھ پاکستان کے لیے، وطن کی عزت و حرمت کے لیے دیا تھا۔ میں نے جنرل قمر جاوید باجوہ کو ہٹانے کے لیے، فوج میں بغاوت کرانے کے لیے انہیں مینڈینٹ نہیں دیا تھا۔

عامر لیاقت نے اپنے پیغام میں دو، تین آڈیوز اور ویڈیوز کا بھی ذکر کرتے ہوئے ان ویڈیوز کو شرمناک، دردناک اور افسوسناک قرار دیا۔ انہوں نے کہا عمران خان صاحب نے طاقت کے نشے میں اندھا ہوکر آئین کو پامال کیا۔ تحریک عدم اعتماد پیش ہونے کے بعد وزیراعظم کسی بھی صورت قومی اسمبلی نہیں رک سکتا۔

یہ بھی پڑھیں: عامر لیاقت حسین نے تحریک انصاف چھوڑنے کا اعلان کر دیا

رکن قومی اسمبلی نے کہا میں 3 اپریل کو ووٹ دینے آیا تھا، دل کی تھوڑی تکلیف تھی، دیر سے پہنچنے کی وجہ سے باہر کھڑا رہ گیا تھا مجھے کسی نے اندر آنے نہیں دیا تھا لہذا میں آج یا کل یا جب بھی اسمبلی میں اجلاس ہوگا آرہا ہوں۔ خان صاحب میں منحرف نہیں تھا نہ منحرف ہوں۔ آپ کے لوگوں نے مجھے ’لوٹا‘ کہا آپ کے لوگوں کی ٹونٹیاں مروڑ دوں گا میں، اگر کسی نے مجھے ’لوٹا‘ کہا۔

عامر لیاقت نے کہا کیا دے دیں گے آپ مجھے اور کیا دے دیں گے لوگ۔ مجھے آپ خرید رہے ہیں، میں بک سکتا ہوں؟ میری قیمت ہے کوئی؟ ہاتھ پکڑ کر لائے تھے آپ مجھ کو تحریک انصاف میں۔ آپ نے مجھ سے خود کہا تھا میں قمر جاوید باجوہ کو ہٹانے والا ہوں اور کیا کیا بتاؤں میں آپ کو۔ میں آپ سے صرف اتنا کہنا چاہتا ہوں کہ آپ اب بھی سمجھ جائیے، لوگ آپ سے محبت کرتے ہیں آپ اعلان جنگ مت کیجئے، ریاست سے کوئی جیت نہیں سکا ہے۔

عامر لیاقت نے کہا میں ووٹ دینے آرہا ہوں قومی اسمبلی میں اور کھل کر کہتا ہوں میں نے کسی سے پیسے نہیں لیے، کسی سے میں نے ساز باز نہیں کی ہے، میں آپ کے خلاف ووٹ دوں گا۔

یہ بھی پڑھیں: عامر لیاقت حسین کو دل کی تکلیف، ایمرجنسی وارڈ میں داخل

عامر لیاقت نے ویڈیو پیغام میں مزید کہا اگر آج آصف علی زرداری صاحب نہیں ہوتے تو پاکستان کھپے کا نعرہ نہیں ہوتا۔ پاکستان تو گیا تھا اس آدمی نے بچالیا پھر پاکستان کو جس کا نام آصف علی زرداری ہے۔ جس کی سیاست سے لاکھ اختلاف کیے جائیں۔ آپ کہتے ہیں آصف علی زرداری سب سے بڑی بیماری، میں کہتا ہوں آصف علی زرداری سب سے بڑی بیداری۔ اس آدمی نے بچالیا سب کو۔ 197 اراکین اسمبلی غدار ہیں آپ کی وجہ سے۔ ہم غدار ہیں تو آپ بھی غدار ہیں۔ آپ کے بنی گالہ میں بیٹھا ہوا ہر فرد غدار ہے۔