راجہ پرویز اشرف بلامقابلہ اسپیکر قومی اسمبلی منتخب

ان کے مقابلے میں کسی نے بھی کاغذات نامزدگی جمع نہیں کرائے

ویب ڈیسک جمعـء 15 اپريل 2022

راجہ پرویز اشرف پیپلزپارٹی دور حکومت میں وزیراعظم بھی رہ چکے ہیں۔ فائل : فوٹو

اسلام آباد: پیپلز پارٹی کے رہنما اور سابق وزیراعظم راجہ پرویز اشرف بلامقابلہ اسپیکر قومی اسمبلی منتخب ہوگئے۔

ایکسپریس نیوز کے مطابق پیپلز پارٹی کے رہنما راجہ پرویز اشرف نے اسپیکر قومی اسمبلی بننے کے لیے کاغذات نامزدگی جمع کرائے، ان کے مدمقابل کسی نے بھی کاغذات نامزدگی جمع نہیں کرائے جس کے سبب راجہ پرویز اشرف بلامقابلہ اسپیکر قومی اسمبلی منتخب ہوگئے۔

راجہ پرویز اشرف کے تجویز اور تائید کنندہ خورشید شاہ اور نوید قمر تھے، اسپیکر قومی اسمبلی کے لیے کسی اور نے کاغذات نامزدگی جمع نہیں کروائے۔

دوسری جانب، وزیراعظم شہباز شریف نے اتحادیوں کو آج افطار ڈنر پر مدعو کیا ہے جس میں وفاقی کابینہ کا حتمی فیصلہ کیا جائے گا۔ افطار ڈنر میں تمام اتحادی جماعتوں کے سربراہان شریک ہوں گے۔

ذرائع کے مطابق وفاقی کابینہ کی تشکیل کے لیے قائم خصوصی کمیٹی نے اپنی رپورٹ وزیراعظم شہباز شریف کو پیش کردی ہے۔ رپورٹ کے مطابق مسلم لیگ ن کو 13، پیپلزپارٹی کو 10 اور جے یو آئی ف کو 3 وزارتیں دینے کا فیصلہ ہوا ہے۔