عالمی مارکیٹ میں کمی کے باوجود مقامی مارکیٹوں میں سونے کی قیمت بڑھ گئی

 کراچی: عالمی مارکیٹ میں سونے کی فی اونس قیمت میں 6 ڈالر کم ہونے کے باوجود پاکستان میں سونے کی فی تولہ قیمت میں 100 روپے اضافہ ہوا۔

ایکسپریس نیوز کے مطابق بین الاقوامی بلین مارکیٹ میں فی اونس سونے کی قیمت 6 ڈالر کی کمی سے 1846 ڈالر کی سطح پر پہنچی مگر مقامی صرافہ مارکیٹوں میں بھی کاروباری ہفتے کے چوتھے یعنی جمعرات کے روز فی تولہ اور دس گرام سونے کی قیمتوں میں بالترتیب 100 روپے اور 85 روپے اضافہ ہوا۔

قیمتوں میں اضافے کے نتیجے میں کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد، پشاور اور کوئٹہ کی صرافہ مارکیٹوں میں فی تولہ سونے کی قیمت بڑھ کر 143300 روپے اور فی دس گرام سونے کی قیمت اضافے کے بعد 122856 روپے کی سطح پر آگئی ہے،

اس کے برعکس فی تولہ چاندی کی قیمت بغیر کسی تبدیلی کے 1590 روپے اور دس گرام چاندی کی قیمت بھی بغیر کسی تبدیلی کے 1363.16 روپے کی سطح پر مستحکم رہی۔