لبنان؛ بدبخت بیٹے نے مصلے پر بیٹھی ماں کو چاقو کے وار کرکے قتل کردیا

بیروت: لبنان میں ایک ہولناک واقعے میں بد بخت بیٹے نے مصلے پر نماز پڑھتی اپنی ماں کو تیز دھار چاقو کے وار کرکے قتل کردیا۔

عرب میڈیا کے مطابق لبنان کے دارالحکومت بیروت کے نواحی علاقے میں بیٹے نے اپنی ماں پر تیز دھار چاقو سے اُس وقت حملہ کردیا جب وہ مصلے پر نماز ادا کر رہی تھیں۔ ماں کو گردن ، سر اور کندھے پر گہری چوٹیں آئیں۔

پڑوسیوں نے شدید زخمی حالت میں ماں کو اسپتال منتقل کیا جہاں انھوں نے دوران علاج دم توڑ دیا۔ بدبخت بیٹے نے فرار ہونے کی کوشش کی تاہم اہل علاقہ نے اسے پکڑ کر پولیس کے حوالے کردیا۔

گرفتاری کے وقت کی ویڈیو وائرل ہوگئی جس میں دیکھا جا سکتا ہے قاتل منہ ہی منہ میں کچھ بڑبڑا رہا ہے۔ اس کی بے ربط گفتگو سمجھ نہیں آرہی ہے اور وہ نشے میں دھت دکھائی دے رہا ہے۔

پڑوسیوں کا کہنا تھا کہ ماں بیٹے اس گھر میں کافی عرصے سے اکیلے رہا کرتے تھے اور کبھی دونوں سے کسی کو شکایت نہیں ہوئی۔ بیٹے کے ساتھ کچھ ذہنی مسائل تھے جس کے لیے ماں بیٹے کو ایک مذہبی عالم کے پاس روحانی علاج کے لیے بھی لے کر گئی تھی۔