وزیراعظم شہباز شریف نے 31 سرکاری افسران کو گریڈ 22 میں ترقی دیدی

ویب ڈیسک  بدھ 18 مئ 2022
وزیراعظم شہباز شریف(فوٹو فائل)

وزیراعظم شہباز شریف(فوٹو فائل)

 اسلام آباد: وزیر اعظم شہباز شریف نے آتے ہی مختلف سروس گروپس کے 31 افسروں کو گریڈ 22 میں ترقی کی منظوری دے دی۔

ایکسپریس نیوز کے مطابق سابق وزیر اعظم عمران خان دور اقتدار میں اکتوبر 2020 کے بعد سے 10 اپریل 2022 تک ترقی پانے سے محروم سرکاری افسران کو گریڈ 22 میں ترقی مل گئی۔

اس عرصے میں بہت سے افسران ترقی کی حسرت دل میں لیے ریٹائر ہوگئے مگر عمران خان نے کسی کو ترقی نہ دی۔

وزیراعظم شہباز شریف نے آتے ہی بورڈ میں ترقیوں کا جائزہ لیا اور خالصتاً میرٹ کو ملحوظ رکھتے ہوئے مختلف سروس گروپس کے 31 افسروں کو گریڈ 22 میں ترقی کی منظوری دے دی۔

وزیراعظم نے بورڈ کے فیصلوں کو فوری طور پر پبلک کرنے کے احکامات جاری کر دیئے۔

وزیراعظم کی ہدایات کے مطابق انٹیلی جنس بیورو کے فواد اسد اللہ خان کو گریڈ 22 میں ترقی دے کر ڈائریکٹر جنرل انٹیلی جنس بیورو تعینات کردیا گیا ہے۔

اس سے قبل گریڈ 21 کے افسر فواد اسداللّٰہ قائم مقام ڈی جی اور کمانڈنٹ آئی بی اکیڈمی تعینات تھے۔

ملٹری لینڈ اینڈ کنٹونمنٹس گروپ کے محمد نعیم جان خان، کامرس اینڈ ٹریڈ گروپ کے رافع بشیر شاہ، انفارمیشن گروپ کے سعید جاوید، پاکستان ریلویز گروپ کے ظفر زمان رانجھا کو گریڈ 22 میں ترقی دیدی گئی۔

شہباز شریف نے میرٹ کو ملحوظ خاطر رکھتے ہوئے ان لینڈ ریونیو سروس کے عامر علی تالپور،فیض الہی میمن اور عاصم احمد، پاکستان کسٹم سروس کی مسز ثریا احمد بٹ اور ڈاکٹر احمد مجتبی میمن کو بھی گریڈ 22 میں ترقی دی گئی۔

فارن سروس آف پاکستان کے مظہر جاوید، سردار شجاع عالم اور بابر امین کی گریڈ 22 میں ترقی کی منظوری دی گئی جب کہ ڈاکٹرعثمان چاچڑ، اعزاز اسلم ڈار، نوید احمد شیخ، مس سارہ سعید، جواد پال اور امداد اللہ بوسال کو بھی ترقی مل گئی۔

سید ظفر علی شاہ، فرحان عزیز خواجہ، ڈاکٹر فخر عالم عرفان، کیپٹن ریٹائرڈ سیف انجم، مسز بشری امان، ذوالفقار حیدر ، نوید علاؤالدین، حامد یعقوب، افتخار علی شلوانی کی گریڈ 22 میں ترقی ہوگئی۔

ترقی پانے والوں میں ڈاکٹر راشد منصور، ڈاکٹر سید توقیر حسین شاہ، ڈاکٹر عصمت طاہرہ بھی شامل ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔