طالبان حکومت کے وزیر خارجہ کی امریکی مندوب سے قطر میں ملاقات

ویب ڈیسک  اتوار 22 مئ 2022
ملاقات قطر کے دارلحکومت دوحہ میں ہوئی، فوٹو: فائل

ملاقات قطر کے دارلحکومت دوحہ میں ہوئی، فوٹو: فائل

دوحہ: امریکا کے خصوصی مندوب ٹامس ویسٹ اور طالبان کے وزیر خارجہ امیر خان متقی سے ملاقات کی اور ملک کے موجودہ صورت حال پر تبادلہ خیال کیا۔

عالمی خبر رساں ادارے کے مطابق افغانستان کے لیے امریکا کے خصوصی مندوب ٹامس ویسٹ نے طالبان حکومت کے وزیر خارجہ امیر خان متقی کے ساتھ قطر کے دارالحکومت دوحہ میں ملاقات کی۔

ملاقات میں دونوں رہنماؤں نے افغانستان میں امن و امان، لڑکیوں کی تعلیم اور خواتین کی ملازمتوں سے متعلق امور پر تبادلہ خیال کیا جب کہ افغان عوام کے لیے امدادی پیکیجز کی فراہمی کے طریقہ کار پر بھی گفتگو کی گئی۔

یہ خبر پڑھیں : طالبان نے لڑکیوں کے سیکنڈری اسکولز پھر بند کر دیئے

ملاقات میں امریکا کے خصوصی مندوب نے طالبان حکومت کے وزیر خارجہ امیر خان متقی کو بتایا کہ افغانستان میں لڑکیوں کے سیکنڈری اسکولوں کی بندش اور خواتین کی ملازمتوں پر واپسی سے متعلق فیصلوں کی عالمی سطح پر مخالفت کی جا رہی ہے۔

یہ خبر بھی پڑھیں : لڑکیوں کے سیکنڈری اسکول کھولنے سے متعلق اچھی خبر جلد سنائیں گے، طالبان 

اس موقع پر طالبان حکومت کے وزیر خارجہ امیر خان متقی نے بتایا کہ لڑکیوں کی سیکنڈری اسکولوں میں انتظامات کو اسلامی تعلیمات اور افغان روایات کے قالب میں ڈھالا جا رہا ہے جس کے بعد جلد ہی اسکول کھلنے کا امکان ہے۔

واضح رہے کہ طالبان حکومت نے مارچ کے ماہ میں سیکنڈری اسکولوں کو کھلنے کے چند گھنٹے بعد ہی دوبارہ بند کرنے کا حکم دیا تھا اور تاحال اسکول بند ہیں۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔