کراچی میں فوم کے گودام میں خوفناک آتشزدگی سے بھاری مالیت کا سامان جل کر خاکستر

 کراچی: شیر شاہ میں فوم کے گودام میں خوفناک آتشزدگی کے دوران بھاری مالیت کا سامان جل کر خاکستر ہوگیا، فائر بریگیڈ حکام نے آگ کو تیسرے درجے کا قرار دیکر شہر بھر سے فائرٹینڈر، باؤزر اور واٹرٹینکر طلب کرلیے۔

ایکسپریس نیوز کے مطابق آتشزدگی کا حالیہ واقعہ کراچی کے علاقے شیرشاہ جہان آباد میں رونما ہوا جہاں فوم کے گودام میں رکھا بھاری مالیت کا سامان جل گیا تاہم اس دوران کوئی جانی نقصان نہیں ہوا، فائر بریگیڈ عملے نے 12 فائر ٹینڈرز اور باوزر کی مدد سے تین گھنٹوں کی سخت کوششوں کے بعد آگ پر قابو پالیا۔

رپورٹ میں کہا گیا ہے کہ شیرشاہ جہان آباد لاشاری محلے میں واقع عبداللہ نامی گوادم میں آچانک آگ بھڑک اٹھی جس نے دیکھتے ہی دیکھتے شدت اختیار کرلی آگ کے شعلے اور سیاں دھواں کئی کلو میٹر دور سے دیکھا جانے لگا۔

آگ کی اطلاع ملتے ہی سیکیورٹی ، فائربریگیڈ اور ریسکیو حکام جائے وقوعہ پر پہنچے اور آگ پر قابو پانے کی کوشش کی تاہم فائر بریگیڈ عملے نے آگ کو تیسرے درجے کی قرار دیکر شہر بھر سے فائر ٹینڈرز طلب کیے اور تین گھنٹے کی طویل جدوجہد کے بعد آگ پر قابو پایا۔

اس حوالے سے فائرآفیسر نے بتایا کہ متاثرہ گودام میں میٹرس فوم تیار کیئے جاتے ہیں اور گودم میں فوم کے ساتھ ساتھ فوم کی تیارمیں استعمال کیا جانے والا کیمیکل بڑی تعداد میں موجود تھا جس کی وجہ سے آگ تیزی سے پھیلی۔

انھوں نے بتایا کہ اس طرح کی آگ کو بھجانے کے لیے ضرور ہوتا ہے کہ گودام میں جو چیز موجود ہیں جس میں آگ دوبارہ بھڑکنے کا خدشہ ہوتا ہے اسے پانی میں تر رکھا جائے۔

فائر بریگیڈ حکام کا کہنا تھا کہ آگ پر قابو پانے کے دوران کسی قسم کا کوئی جانی نقصان نہیں ہوا اور مالی نقصان کا فوری اندازہ نہیں لگایا جاسکا ہے۔

انہوں نے کہا کہ جس وقت گودام میں آگ لگی، گودام کے ملازمین جمعے کی نماز کی ادائیگی کےلیے گئے ہوئے تھے، اگر آتشزدگی کا واقعہ رات کو پیش آیا ہوتا تو بڑا جانی نقصان ہونے کا خدشہ تھا۔

فائر بریگیڈ عملے نے حکام بالا سے اپیل کی کہ فوم بنانے والی فیکڑی اور گودام کو رہائشی علاقے سے کسی دوسرے مقام پر منتقل کیا جائے، متاثرہ علاقے میں مکین بنیادی سہولیات سے محروم ہیں جس کی وجہ سے انہیں شدید پریشانی کا سامنا کرنا پڑھتا ہے۔