وزیر خارجہ بلاول بھٹو زرداری کی سی پی این ای کے نومنتخب عہدیداروں کو مبارکباد

پاکستان پیپلز پارٹی (پی پی پی) کے چیئرمین اور وزیر خارجہ بلاول بھٹو زرداری نے کونسل آف پاکستان نیوز پیپرز ایڈیٹرز (سی پی این ای) کے سالانہ انتخابات میں کامیاب ہونے والے امیدواراں کو مبارک باد پیش کی اور تہینتی پیغام میں کہا کہ جمہوریت کے استحکام اور آزادی صحافت کے فروغ کے باب میں سی پی این ای کا کردار قابلِ تحسین ہے۔ 

میڈیا سیل بلاول ہاوَس کی جانب سے جاری کردہ بیان کے مطابق چیئرمین پی پی پی اور وزیر خارجہ نے سی پی این ای کے نومنتخب صدر کاظم خان اور جنرل سیکریٹری میاں عامر محمود کو مبارکباد دی ہے۔ انہوں نے ایاز خان کو سینئر نائب صدر، یوسف نظامی کو ڈپٹی سیکریٹری جنرل، غلام نبی چانڈیو کو فنانس سیکرٹری، زبیر محمود کو انفارمیشن سیکریٹری، ڈاکٹر جبار خٹک کو نائب صدر سندھ، مقصود یوسفی کو جوائنٹ سیکریٹری سندھ، حیدر امین کو نائب صدر پنجاب، سلمان مسعود کو نائب صدر اسلام آباد، طاہر فاروق کو نائب صدر خیبر پختونخواہ اور عارف بلوچ کو نائب صدر بلوچستان منتخب ہونے پر مبارک باد دی ہے۔ انہوں نے سی پی این ای کی اسٹینڈنگ کمیٹی کے نو منتخب 44 اراکین کو بھی مبارک باد پیش کی ہے۔

علاوہ ازیں بلاول بھٹو زرداری نے اپنے پیغام میں مزید کہا کہ پاکستان پیپلز پارٹی ذرائع ابلاغ کی آزادی پر یقین رکھتی ہے اور یقین دلایا کہ ملک میں آزادیِ اظہار و صحافت کو یقینی بنانے اور فعال میڈیا کی ترقی کے لیے وہ ہر ممکن تعاون جاری رکھیں گے۔