شاہد آفریدی نے میچ کا نقشہ ہی بدل ڈالا، راشد لطیف

لاہور: سابق کپتان راشد لطیف کا کہنا ہے کہ شاہد آفریدی نے میچ کا نقشہ ہی بدل ڈالا، جارح مزاج بیٹسمین کی کارکردگی قابل فخر ہے، فواد عالم نے بھی حق ادا کردیا۔

سابق ٹیسٹ کرکٹر عبدالقادر نے کہا کہ آل رائونڈر  پاکستان کرکٹ کا چاند ہے، تنقید کرنے والے سابق کرکٹرز حوصلہ بڑھائیں تو ملک اور قوم کیلیے بہتر ہوگا۔ سابق اسپنر مشتاق احمد نے کہا کہ ایسی اننگز روز روز دیکھنے میں نہیں آتیں،گرین شرٹس کو  اپنی غلطیوں سے سبق سیکھنا ہوگا، فائنل میں غلطی کی گنجائش نہیں ہوگی۔تفصیلات کے مطابق ’’ ایکسپریس نیوز‘‘  سے گفتگو کرتے ہوئے راشد لطیف نے کہا کہ ایشیا کپ میں بنگلہ دیش کیخلاف بڑا ہدف حاصل کرنے میں شاہد آفریدی کا کردار انتہائی اہم رہا،آل رائونڈر نے کمانڈ سنبھالتے ہی اتنا بڑا فرق ڈال دیا کہ بنگال  ٹائیگرز کو سنبھلنے کا موقع ہی نہ مل سکا، جارح مزاج بیٹسمین کی قوم تو گرویدہ ہے ہی آج انھیں خود بھی اپنی کارکردگی پر ناز ہونا چاہیے۔

راشد لطیف نے کہا کہ فتح میں فواد عالم کا کردار بھی انتہائی اہم رہا،  نوجوان بیٹسمین نے نہ صرف ایک اینڈ سنبھالا  بلکہ بروقت سنگلز اور ڈبلز بھی لیتے رہے۔ سابق ٹیسٹ کرکٹر عبدالقادر نے کہا کہ آفریدی پاکستان کرکٹ کا چاند ہے، آج جوبن پر آیا تو آب و تاب نے سب کی نظریں خیرہ کردیں، آل رائونڈر پر تنقید کرنے والے سابق کرکٹرز سے درخواست ہے کہ ان کا حوصلہ بڑھایا کریں تو ملک اور قوم کے مفاد میں بہتر ہوگا۔ سابق سپنر مشتاق محمد نے کہا کہ پاکستان نے بولنگ اور فیلڈنگ میں غلطیاں کر کے زیادہ رنز بنوادیے، بیٹنگ لائن نے ثابت قدمی سے ایک مشکل ہدف بھی حاصل کرلیا،آفریدی نے جو بیٹنگ کی ویسی اننگز روز روز دیکھنے میں نہیں آتیں، گرین شرٹس کو  اپنی غلطیوں سے سبق سیکھ کر آگے بڑھنے کی ضرورت ہے،انھوں نے کہا کہ فائنل میںمضبوط سری لنکن حریف ہر کمزوری سے فائدہ اٹھانے کی صلاحیت رکھتی ہے، اب غلطی کی گنجائش نہیں، ہمیں کم سے کم مواقع دینا ہوں گے۔