کراچی کے مختلف علاقوں سے دو افراد کی پھندا لگی لاشیں برآمد

 کراچی: احسن آباد اور گلستان جوہر سے دو افراد کی گلے میں پھندا لگی لاشیں برآمد ہوئی ہیں، پولیس نے واقعے کو خودکشی قرار دیکر تحقیقات شروع کردیں۔

ایکسپریس نیوز کے مطابق سائٹ سپر ہائی وے صنعتی ایریا کے علاقے احسن آباد لاکھانی ٹاور کے فلیٹ سے ایک شخص کی پھندا لگی لاش ملنے کی اطلاع پر پولیس نے موقع پر پہنچ کر لاش ضابطے کی کارروائی کے لیے عباسی شہید اسپتال پہنچائی۔

ایس ایچ او رانا حسیب کے مطابق متوفی کی شناخت 27 سالہ شاہ زیب ولد دلبر حسین کے نام سے کی گئی جو کہ فلیٹ میں اکیلا ہی رہتا تھا جبکہ واقعہ کی اطلاع فلیٹ کے مکینوں نے پولیس کو دی تھی۔

متوفی کا آبائی تعلق رحیم یار خان سے تھا تاہم ابتدائی تحقیقات میں واقعہ بظاہر خودکشی معلوم ہوتا ہے جبکہ فوری طور خودکشی کی وجہ کا تعین نہیں ہو سکا،پولیس واقعے کی مزید تفتیش کررہی ہے۔

دوسری جانب شارع فیصل کے علاقے گلستان جوہر حسین ہزارہ گوٹھ میں مکان سے ایک شخص کی گلے میں پھندا لگی ہوئی لاش ملی جس کی اطلاع پر پولیس نے موقع پر پہنچ کر لاش ضابطے کی کارروائی کے لیے جناح اسپتال پہنچائی جہاں متوفی کی شناخت 33 سالہ نوید ولد عبدالمجید کے نام سے کی گئی۔

پولیس کے مطابق ابتدائی تحقیقات واقعہ خودکشی لگ رہا ہے جبکہ فوری طور پر خودکشی کی وجہ کا معلوم نہیں ہو سکا تاہم پولیس واقعہ کی مزید تحقیقات کر رہی ہے ۔