پولیس میں بھرتی کا خواہشمند نوجوان رننگ ٹیسٹ میں زندگی کی بازی ہار گیا

 کراچی: پولیس میں بھرتی کا خواہشمند نوجوان کراچی پولیس ٹریننگ سینٹر میں رننگ ٹیسٹ دیتے ہوئے جان کی بازی ہار گیا۔

ایکسپریس نیوز کے مطابق پولیس میں بھرتی کےلیے رننگ ٹیسٹ کے دوران نوجوان کے جاں بحق ہونے کا واقعہ کراچی کے سعید آباد شاہد حیات پولیس ٹریننگ سینٹر میں پیش آیا۔

پولیس ٹریننگ سینٹر میں نوجوان رننگ ٹیسٹ کے دوران دوڑ لگاتے ہوئے گر کر بے ہوش ہوگیا تھا جسے موقع پر موجود پولیس اہلکاروں نے فوری طبی امداد کیلئے قریب ہی قائم مرشد اسپتال پہنچایا۔

اسپتال میں ڈاکٹروں نے نوجوان کا طبی معائنہ کرنے کے بعد اس کی موت کی تصدیق کردی۔

پولیس حکام کے مطابق متوفی کی شناخت 19 سالہ اریب عامر کے نام سے ہوئی جبکہ متوفی اورنگی ٹاون کا رہائشی تھا جس کی لاش ضابطے کی کارروائی کے بعد ورثا کے حوالے کر دی گئی ۔