آرمی چیف سے ترک کمانڈر کی ملاقات، پیشہ ورانہ امور پر گفتگو

ویب ڈیسک  منگل 5 جولائی 2022
دونوں ممالک کے درمیان تعلقات کی جڑیں گہری ہیں، جنرل باجوہ (فوٹو فائل)

دونوں ممالک کے درمیان تعلقات کی جڑیں گہری ہیں، جنرل باجوہ (فوٹو فائل)

 راولپنڈی: آرمی چیف جنرل قمر جاوید باجوہ سے کمانڈر ترک لینڈ فورسز جنرل موسیٰ اوسیور نے جی ایچ کیو میں ملاقات کی ہے۔

پاک فوج کے شعبہ تعلقات عامہ (آئی ایس پی آر ) کے مطابق ملاقات کے دوران دونوں برادر ممالک کے درمیان دفاعی اور سکیورٹی تعاون پر خصوصی زور دینے کے ساتھ باہمی اور پیشہ ورانہ دلچسپی کے امور پر تبادلہ خیال کیا گیا۔

آرمی چیف جنرل قمر جاوید باجوہ نے گفتگو کرتے ہوئے کہا کہ ہم ترکی کے ساتھ اپنے برادرانہ تعلقات کو انتہائی قدر کی نگاہ سے دیکھتے ہیں۔ دونوں ممالک کے درمیان تعلقات کی جڑیں تاریخ میں گہری اور ہماری ثقافتی و مذہبی وابستگیوں میں جڑی ہوئی ہیں۔

اس موقع پر خصوصاً تربیت اور انسداد دہشت گردی کے شعبوں میں فوجی تعلقات کو مزید بہتر بنانے پر اتفاق کیا گیا۔ ملاقات میں ترک لینڈ فورسز کے کمانڈر جنرل موسیٰ اوسیور نے پاکستان کی مسلح افواج کی پیشہ ورانہ مہارت کا اعتراف کرتے ہوئے  مختلف شعبوں میں تعاون بڑھانے کے عزم کا اظہار کیا۔

آئی ایس پی آر کے مطابق  ترک مہمان نے پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا بھی عہد کیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔