کراچی میں بلند عمارت سے گر کر نوجوان جاں بحق

ویب ڈیسک  اتوار 31 جولائ 2022
فوٹو فائل

فوٹو فائل

 کراچی: شہر قائد کے علاقے کلفٹن میں بلند و بالا رہائشی عمارت سے پراسرار طور پر گرکر نوجوان زندگی کی بازی ہار گیا۔

ایکسپریس نیوز کے مطابق بلند و بالا عمارت سے گرکر مرنے کا افسوسناک واقعہ کراچی کے علاقے کلفٹن میں دو دریا پر پیش آیا جہاں ایک نوجوان رہائشی عمارت کی 17 ویں منزل سے پراسرار طور پر گر کر جاں بحق ہوگیا۔

پولیس نے ورثا کی مدعیت میں قتل کی دفعات کے تحت مقدمہ درج کرکے 7 افراد کو حراست میں لے لیا۔

پولیس حکام کے مطابق واقعہ ہفتہ اور اتوار کی درمیانی شب میں پیش آیا اور پولیس کو اتوار کی صبح اطلاع ملی جس پر پولیس نے لاش تحویل میں لے کر اسپتال منتقل کر دی۔

مقتول کی شناخت 28 سالہ عادل مسعود کے نام سے کی گئی جس نے حال ہی میں آئی بی اے سے بی بی اے کی تعلیم مکمل کی تھی، جس کے والد کا انتقال ہوچکا ہے۔

پولیس ذرائع کا کہنا ہے کہ والدہ بیرون ملک اور بہن لاہور میں رہائش پذیر ہے جب کہ متوفی خود گلستان جوہر کا رہائشی تھا۔

پولیس حکام نے عادل نامی نوجوان کے دوستوں کا حوالہ دیتے ہوئے کہا کہ عادل کے دوستوں نے ابتدائی بیان میں بتایا ہے کہ وہ سب نشہ کررہے تھے اور انھیں معلوم ہی نہیں ہوسکا کہ عادل کس وقت بالکونی سے گرگیا، پولیس نے ساتوں دوستوں کو حراست میں لے لیا ہے جبکہ واقعے کی اطلاع ملتے ہی عادل کی بہن بھی کراچی پہنچ گئی۔

پولیس نے بہن کی مدعیت میں مقدمہ درج کرکے مزید تحقیقات کا آغاز کردیا ہے، عادل کی بہن نے اس کے دوستوں پر قتل کا شبہ ظاہر کیا ہے، پولیس کا کہنا ہے کہ پوسٹ مارٹم کے بعد ہی اصل وجہ موت کا تعین ہوسکے گا ۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔