کامن ویلتھ گیمز میں نوح بٹ کی کامیابی پر شوبز شخصیات کا ردِعمل

ویب ڈیسک  جمعرات 4 اگست 2022
شوبز شخصیات کی جانب سے نوح بٹ کی کامیابی پر خوشی کا اظہار کیا جارہا ہے(فائل فوٹو)

شوبز شخصیات کی جانب سے نوح بٹ کی کامیابی پر خوشی کا اظہار کیا جارہا ہے(فائل فوٹو)

کراچی: کامن ویلتھ گیمز 2022 میں گولڈ میڈل جیتنے پر شوبز شخصیات کا کہنا ہے کہ نوح دستگیر بٹ قوم کا سر فخر سے بلند کر دیا ہے۔

برطانوی شہر برمنگھم میں جاری کامن ویلتھ گیمز 2022 میں پاکستان کی کامیابیوں کا سلسلہ شروع ہوگیا برمنگھم میں پاکستان کی نمائندگی کرنے والے ویٹ لفٹر نوح دستگیر بٹ نے گولڈ میڈل اپنے نام کرلیا۔

نوح بٹ نے جہاں یہ اعزاز اپنے نام کر کے قوم کا سر فخر سے بلند کیا وہیں شوبز شخصیات کے بھی دل جیت لئے۔

شوبز شخصیات کی جانب سے نوح بٹ کی  کامیابی پر خوب جشن منایا جا رہا ہے ٹوئٹ کے زریعے پاکستان کے معروف اداکار اعجاز اسلم نے نوح بٹ کو سراہتے ہوئے کہا ’نوح نے کامن ویلتھ گیمز میں گولڈ میڈل اپنے نام کیا اس پر بےحد فخر ہے ہمیشہ یوں ہی کامیاب رہو‘۔


پاکستانی ہدایتکار نبیل قریشی نے خوشی کا اظہار کرتے ہوئے لکھا کہ ’اگست کے مہینے میں گولڈ میڈل جیتنے کی بےحد ضرورت تھی‘۔

پاکستان شوبز انڈسٹری کے نامور اداکار عمران اشرف نے دلچسپ انداز میں ٹوئٹ کرتے ہوئے لکھا کہ ’بند کردو مارکٹیاں دے شٹر پاکستان زندہ باد‘۔

یاد رہے کہ کامن ویلتھ گیمز میں نوح بٹ نے اسنیچ اور کلین اینڈ جرک میں سب سے زیادہ وزن چار سو کلو گرام اٹھا کر بھارت، آسٹریلیا، انگلینڈ، کنییڈا کے ویٹ لفٹرز کو شکست دی اور نئی تاریخ رقم کردی ہے۔

کامن ویلتھ گیمز میں گولڈ میڈل جیتنے پر حکومت کی طرف سے نوح دستگیر بٹ کیلئے 50 لاکھ روپے انعام کا اعلان بھی کیا گیا ہے۔

 

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔