شہباز گل کی پیشی کے موقع پر میڈیا پر کوئی پابندی نہیں لگائی، جوڈیشل مجسٹریٹ

ثاقب بشیر  بدھ 10 اگست 2022
فوٹو: انٹرنیٹ

فوٹو: انٹرنیٹ

 اسلام آباد: جوڈیشل مجسٹریٹ اسلام آباد  عمر شبیر کا کہنا ہے کہ شہباز گِل کی پیشی کے موقع پر میڈیا پر کوئی پابندی نہیں لگائی۔

ایکسپریس نیوز کے مطابق اسلام آباد ہائی کورٹ جرنلسٹس ایسوسی ایشن نے شہباز گِل کی پیشی کے دوران صحافیوں کی عدالت میں داخلے پر پابندی کے معاملہ پر مختلف اداروں سے تعلق رکھنے والے کورٹ رپورٹرز عدالت کے سامنے پیش ہوئے۔

جوڈیشل مجسٹریٹ عمر شبیر نے اس موقع پر بتایا کہ ہماری طرف سے میڈیا پر کوئی پابندی نہیں لگائی گئی، ملزم کے وکیل کو بھی کہا ہے کہ ہم نے کوئی پابندی نہیں لگائی ہے۔

ہائی کورٹ جرنلسٹس ایسوسی ایشن کے صدر ثاقب بشیر نے بتایا کہ سیشن جج کے آفس نے بھی کہا ہے کہ کوئی پابندی نہیں ہے، تاہم پولیس نے آپ کا نام استعمال کر کے میڈیا کو داخلے سے روکا ہے۔

انہوں نے عدالت سے استدعا کی کہ آئندہ سماعت کے لیے آرڈر کر دیں تاکہ صحافیوں کو نہ روکا جائے۔ جوڈیشل مجسٹریٹ نے کہا کہ صحافیوں پر نہ پہلے پابندی لگائی  نہ آئندہ ہو گی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔