آرٹیکل 6 لگنا شروع ہوا تو گردنیں زیادہ اور رسے کم پڑ جائیں گے فواد چوہدری

(فوٹو: فائل)

---

ISLAMABAD: پاکستان تحریک انصاف کے سینئر نائب صدر فواد چوہدری نے کہا ہے کہ آرٹیکل 6 لگنا شروع ہوا تو ملک میں رسے کم پڑ جائیں گے کیونکہ گردنیں زیادہ ہیں۔

اسلام آباد میں میڈیا سے گفتگو کرتے ہوئے فواد چوہدری کا کہنا تھا کہ پاکستان میں انصاف کا بول اُسی وقت بالا ہوگا جب امیر اور غریب کو برابر کی سزا دی جائے گی، ایسا نہیں ہوسکتا کہ کمزور کو اٹھا کر جیل میں ڈال دیا جائے اور تگڑے آدمی کو ریلیف ملے، جب تک یہ نظام ہے پاکستان بنانا ری پبلک کہلائے گا۔

انہوں نے کہا کہ پاک فوج اور ہمارے درمیان تفریق پیدا کرنے والے بے وقوف لوگ ہیں جنہیں ناکامی کا سامنا کرنا پڑے گا۔ فواد چوہدری نے کہا کہ موجودہ کابینہ باہر نکلنے کے قابل نہیں کیونکہ لوگ انہیں دیکھ کر جوتے اتار لیتے ہیں، انہوں نے بجلی کی قیمتوں میں اس قدر اضافہ کردیا کہ غریب کا جینا ہی محال ہوگیا۔

پی ٹی آئی رہنما نے کہا کہ زرداری، شریف خاندان اور ایسے تمام لوگ ایسے نظام سے تعلق رکھتے ہیں جہاں محنت کا نام و نشان نہیں بلکہ لوٹ مار، کرپشن اور دوسروں کے حق پر ڈاکا ڈالنا شامل ہے، یہ لوگ اقتدار میں آتے اور ملک کو لوٹ کر چلے جاتے ہیں کیونکہ ان کے گھر اور جائیدادیں دبئی و لندن میں ہیں۔

مزید پڑھیں: شہباز گل کا بیان پی ٹی آئی کا بیانیہ نہیں ہے، فواد چوہدری

انہوں نے کہا کہ شہباز شریف پر آج بھی 24 ارب روپے منی لانڈرنگ کا اوپن شٹ کیس ہے مگر وہ اقتدار پر بیٹھا ہے جبکہ اُس کے بیٹے کو بھی وزیر اعلیٰ بنوایا گیا جس کے خلاف بے ضابطگیوں کے مقدمات زیر سماعت ہیں۔

فواد چوہدری کا کہنا تھا کہ 13 اگست کو لاہور میں عظیم الشان اجتماع ہوگا،ہمارے اجتماع میں کبھی بھی کسی کی املاک کو نقصان نہیں پہنچا، لاہور کے لوگ ثابت کریں گے ان کے دل تحریک انصاف کے نام سے دھڑکتے ہیں۔

فواد چوہدری نے کہا کہ مریم اورنگزیب کو وزیر اطلاعات تو بنا دیا گیا لیکن وزارت کا بیڑا غرق ہوگیا جبکہ ہم نے پی ٹی وی کو خسارے سے نکال کر منافع والا ادارہ بنا دیا تھا، مریم اورنگزیب کینڈی کرش کھیلتی رہتی ہیں انہیں نقصان سے کوئی پرواہ نہیں ہے۔

پی ٹی آئی کے سینئر نائب صدر نے کہا کہ مریم اورنگزیب کہتی ہیں عمران خان کو پسینے آرہے تھے ، دراصل عمران خان ایتھلیٹ ہیں روزانہ دو گھنٹے ایکسرسائز کرتے ہیں، مسلم لیگ ن کے رہنماؤں کو چیلینج ہے کہ کوئی بھی لیڈر آکر ایتھیلیٹ کیٹیگری میں عمران خان سے مقابلہ کرلے۔