ملک دشمن عناصر یوم آزادی پر دہشت گردی کرنا چاہتے ہیں، وزیر اعلیٰ بلوچستان

ویب ڈیسک  ہفتہ 13 اگست 2022
عبدالقدوس بزنجو۔ : فوٹو : فائل

عبدالقدوس بزنجو۔ : فوٹو : فائل

 کوئٹہ: وزیراعلیٰ بلوچستان عبدالقدوس بزنجو نے کہا ہے کہ ملک دشمن عناصر یومِ آزادی کے موقع پر دہشت گردی کے ذریعے صوبے میں اپنی موجودگی ثابت کرنا چاہتے ہیں۔

ایکسپریس نیوز کے مطابق وزیراعلیٰ بلوچستان کی آئی جی بلوچستان سے ملاقات ہوئی، جس میں یوم آزادی کے حوالے سے سیکیورٹی انتظامات پر تبادلہ خیال کیا گیا جبکہ پولیس سربراہ نے عبدالقدوس بزنجو کو بریفنگ بھی دی۔

آئی جی سے گفتگو کرتے ہوئے وزیراعلیٰ نے کہا کہ دہشت گرد عناصر معصوم غریب اور بے گناہ افراد کو یوم آزادی پر ٹارگٹ کر کے اپنے مذموم مقاصد کو پورا کرکے اپنی موجودگی ثابت کرنا چاہتے ہیں۔

انہوں نے کہا کہ دشمن کی ہر سازش کو عوام کی حمایت سے ناکام بنائیں گے، ہماری سیکورٹی فورسز ملک دشمن عناصر سے نمٹنے کی بھرپور صلاحیت رکھتی ہیں، عوام صوبے بھر میں آزادی کی تقریبات بھرپور طریقے سے منانے کے لیے تیار ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔